人生總有不如意嘅事，政治上尤其激烈。例如拉布，拉下拉下，原本一個好有用的武器，隨著次數越多，效果越低，最終點樣拉布都唔會有媒體報道嗰陣，呢招就會泡沫化。我依家都見到個「拉布」泡，幾時泡沫化，可能下次拉布，已經冇媒體跟進。
你會話：「唓！香港主流媒體唔係投共親共，就係媚共懼共，我地唔需要主流媒體嘅報道，個個都係CCTV！」既然係咁，大家不如丟咗部電視，從此唔睇電視新聞啦！香港人心態都係，又要鬧又要睇。政治八卦化，同香港民情好有關係，因為無論你睇政治、社會、中國定係國際之新聞，心態同睇娛樂新聞無分別。
言歸正傳。有人民望低，需要一些政策來拉抬聲勢。坦白講，有人話要時時落區，講咗一排，聲望都升唔到上去，依家落區仲要唔通知記者。親民與怕瘀，一線之差啫！執政九個月，仲有乜嘢牌可打？最好之一招，都仲係賴前朝。即係話，前朝惡習太多，現屆要花好長時間來撥亂反正。
賴前朝之最好方法，就係有冇方法搵到一件貪腐分子，小事化大，鬥臭鬥垮之。好多年前，陳水扁國務機要費案，就係用呢招。佢賴來賴去，先賴上手，冇畀到足夠時間之交接，令佢唔知點樣開展秘密外交，然後又賴上手，話要claim國務機要費，就要求其搵啲單來冚數，結果手下原來要用超級市場啲單據來埋數，諸如此類。
呢個世界，咪當人傻啦，一聽就知似是而非，亂咁講。阿扁見群情洶湧，真係擋都唔住。佢手下心生一計，唯有用呢招：話上手都係貪腐，佢仲貪過全人類。於是有一天，外邊有爆料話，當年李登輝出外公幹之時，私下拿一大堆錢去新加坡，呢啲料如果真係爆，可能好多人會出事。結果呢，聽聞爆到呢一步，有人警告阿扁要收手。跟手？哈哈！阿扁單嘢，藍綠兩營，表面瘋狂，輕輕掛起，等佢落台再搞過。到咗前年，阿扁再響口，親自爆李登輝運走五十萬美金去新加坡，但係，件事早已不了了之，無人有興趣矣。
阿扁就係嗰啲，以為爆上手料，就可以轉移視線之餘，又可以拖上手落水，期望可以挽回支持。呢種手法要成功，就需要用smart bomb。講嘅係爆料之後，點樣控制個炸彈，要炸到幾深幾多同幾大，唔好炸得過晒火位，以免傷害無辜兼自己人。
蠢嘅政客，爆上手之手下貪腐嘅時候，結果傷及無辜，甚至連自己都炸埋，唔知點收科，得罪晒全宇宙。真係估唔到，像阿扁之類人士，華人地區處處有。有人話，今次事件涉及有人想響香港，掃晒香港之江系人馬，劍指北京權鬥。是耶非耶？唔知呢。(二之二)