早幾日有個老友同Ray講，佢今年讀小三個大仔，聽完三位特首候選人政綱後已經有心水星期五投俾邊個。聽到Ray一頭霧水，咩小三咩星期五？老友詳細講，原來葵涌亞斯理衛理小學為咗令學生多啲生活體驗，搞咗個特首選舉，揀咗三位小六生扮演三位候選人，讓全校四百幾位師生及職工，星期五，即係今日，來一場暗票選舉。
Ray打俾校長林德育問個究竟，原來校方原意係想學生學習一下乜嘢係投票，仲安排埋同教會幼稚園百幾位學生當日都過埋嚟一齊投。但係揀特首人選時，意外發現高年級嘅學生為咗「做好呢份工」，積極鑽研咗三人嘅政綱，喺禮堂講解政綱時，「林鄭月娥」真係好仔細講小三TSA 的安排，同埋承諾會喺地鐵內裝Wifi。現場反應激烈，有同學反問番點解香港無台灣咁先進，台灣一早就有公用Wifi 喇，林鄭一樣答得好得體。Ray好好奇，家陣校內民意取向如何？校長話，聽完政綱，暫時傾向係鬍鬚曾，不過就連校長都好奇，今日的投票結果又會係點，同真實世界又會相差幾遠呢？！