Ray好喜歡食日本嘢。聽到日本著名廚藝學院「服部營養專門學校」日本料理次席教授 平塚未來 近日來港，昨日專誠去職訓局轄下國際廚藝學院(ICI)睇佢獻技，的確係非同凡響。簡單如昆布湯，便顯出其中的學問與專業。
平塚未來
平塚san來頭唔細，佢係日本政府厚生勞動省認定專門調理師同埋日本料理研究會導師、又有處理雞泡魚牌照，仲係一名品酒師。佢當場示範幾款日本菜式，如昆布湯、天婦羅、魚刺身，聽落平平無奇，但愈平凡要煮得好，就愈顯真功夫。例如昆布湯，平塚san話，首先昆布分4種，要因應唔同料理去揀適合種類，浸泡昆布時間亦因應季節有唔同，夏天可以放2個鐘，冬天就要多一倍時間，但唔可以放太耐，否則就會有雜質。Ray親口試過，又真係幾清甜，而天婦羅炸粉都厚薄適中，唔會厚到食唔到食材本身味道。
ICI去年同「日本料理海外普及推進機構(JRO)」合作，引入「日本料理廚藝認證計劃」。ICI三個全日制證書課程「日本菜烹飪證書」、「壽司製作證書」及「鐵板燒烹飪證書」畢業學員，可獲得由日本農林水產省頒發「國外日本料理烹飪技巧銅徽章證書」。相信日後喺香港，應該可以更容易食到正宗日本菜啦！
