講開李超人，佢旗下的零售店舖Ray都幫趁唔少，原來屈臣氏集團出嘅「易賞錢」卡今年推出已經有10周年，方便消費者到屈臣氏、百佳、TASTE、豐澤等購物時儲積分，但經常要帶多張儲分卡又真係幾唔方便。昨日佢地終於宣布推出手機應用程式，日後可以唔使再帶實體卡。
屈臣氏集團首席營運總監倪文玲(圖)同Ray講，「易賞錢」現時有360萬會員，約兩成會員屬於30歲以下的年齡層，希望推出手機應用程式後，可吸引更多年輕用家。只要下載並啟用「易賞錢」手機應用程式，即可獲最高總值超過4千港元的現金券或折扣獎賞，又可參加大抽獎，有機會羸得FIVB世界女排大獎賽香港站VIP門票。
程式仲有一個新安排，設有「分享積分」功能，會員可與家人好友互相轉贈積分，亦可選擇將「易賞錢」帳戶內的積分轉化成善款；會員由即日起至12月底透過「易賞錢」的「愛心獻積分」功能以積分捐款，捐贈予六間指定慈善機構(包括香港公益金、惜食堂、香港家庭福利會等)，集團將捐出同等金額的善款予同一慈善機構。