土下座經常都提自己一把年紀，口味同後生仔會有所分別，例如《超級機器人大戰》系列，冇經歷過當年「機戰」全盛期，又真係好難解釋到俾啲後生仔知有咩咁好玩。最近BANDAI NAMCO公布咗下隻機戰叫《超級機器人大戰T》，但成為fans話題嘅，反而係同期公布嘅手機版《超級機器人大戰DD》，因為唔同上次嗰隻四不象，今次真係用返經典戰棋玩法！收錄作品更同《T》相似，甚至連《T》都冇嘅漫畫作品《惡魔人》同《新世紀福音戰士》都有！加埋原創角色、機體同故事，直情似一隻完整嘅機戰game，下年就會推出。就如《夢幻模擬戰》呢隻當年都屬於冷門嘅遊戲，都可以靠手機平台打返入後生仔市場，我諗呢隻機戰極有可能係機戰全面回歸新時代嘅契機。