林青霞去年曾與姜濤會唱，今次演唱會亦有捧場。(林青霞微博)
姜濤昨晚(20日)《KEUNG TO ”LAVA“ LIVE 2025》第4場。去年曾與姜濤在在慈善晩宴合唱張國榮《明星》的林青霞，昨晚亦有捧場，林青霞在社交平台分享與姜濤的合照，寫道：「這位是去年跟我一起合作『腦智同護』公益活動的偶像歌手姜濤。他的真誠、善良和努力，令到公衆都愛他、支持他。今晚去欣賞他的演唱會，觀眾席人山人海，座無虛席，在此祝福他一切順利！前途無量。」
姜濤最喜愛《用背脊唱情歌》
請來好友Gareth. T湯令山擔任嘉賓，姜濤搞笑戴上黑超扮Gareth. T，兩人合唱《用背脊唱情歌》後，姜濤笑問：「你平時戴黑超點睇到嘢？」接著他率先「示愛」，「你呢首《用背脊唱情歌》喺我心目中，係今年我最喜愛嘅一首歌，究竟經歷咗乜嘢可以寫出呢首歌，(湯：唔想再提返)，你好似有一排冇寫歌俾我？」兩人認識逾5年，Gareth. T多謝姜濤給他機會寫歌，姜憶述Gareth. T為他作曲兼監製《Master Class》時，孭著背囊的模樣，Gareth. T笑回︰「我而家都係孭背囊。」，姜濤續指，「雖然私底下無好多交流，但有咩事好想用歌去達，Gareth即刻明我想要啲乜嘢，每次俾好多新衝擊我。」兩人擁抱並互相多謝後，姜濤將舞台留給Gareth T獨唱《去北極忘記你》。
自揭姜濤A情緒主導
昨晚，姜濤唱有份作曲的新歌《寂寞圓舞》前，分享這一年姜濤內心的小故事，形容這歌是過去一年的自我對話，「其實姜濤一直有分姜濤A、姜濤B，唔係你哋講嗰個姜B。過去幾年，姜濤A係好直接、好專注自己事業、專注人哋點睇自己嘅一個人。姜濤A唔係你哋喺台上見到嗰個佢，佢只會出現喺離開台嘅時候，姜濤A嘅面貌只係得身邊嘅人睇過，花姐成日話頂唔順，就係姜濤呢一面，佢係任性好直率嘅一個人，會俾情緒主導咗自己，無真正同自己溝通，我成日都話你哋要同自己溝通多啲，我發現無同自己溝通過，而過去幾年嘅我就係俾佢主導好多情緒，亦都傷害咗好多身邊好珍視好重視嘅人。」
兩個版本學習共生
其後，姜濤自言這幾年研究很多宗教佛學靈性哲學，令自己心理有更多學習，所以演唱會亦採用了兩極陰陽概念。他唱《Better Man》前，就分享姜濤B的故事，「姜濤B係一個好懂事、好理性嘅一個人，佢發覺呢幾年愈嚟愈無辦法同姜濤A去溝通，因為真係有太多事情發生嘅時候，姜濤A俾情緒主導好多，慢慢姜濤B無辦法handle到佢，因為好難好難去控制，姜濤B都唔知可以點做，只可以每次同姜濤A講唔好咁，人哋唔鍾意，但佢忽略姜濤A真正想需要嘅嘢，姜濤A擔心失去、好唔相信呢個世界真係咁愛呢個人。」他自言看著姜糖的應援展覽，有時覺得不認識展覽中的自己，不清楚大家支持的，是否最真實的自己，一直不知姜濤A和姜濤B之間，要選擇哪一位，後來才領悟，「我唔需要佢兩個對立，我需要佢哋共生，因為只有共生先可變成一個better man！」
成長改變 必歷痛苦
姜濤昨晚換了一件綠色配白色兔仔帽歌衫，登上「吊臂360」唱歌，他《On a Sunny Day》前，再次重申演唱會核心主題「重生」一直無變，他自言這一年曾找很多方法令姜濤A和B共生，因為這兩個姜濤才有今日站台的他，「當你想成長改變嘅時候，一定係好痛苦，但千祈唔好拋棄你過去嘅一切，記住你之前經歷過嘅嘢，繼續向前行。」
至於第3場則請了林家謙擔任嘉賓，兩人合唱《四月物語》後，向來鬼馬的家謙笑言，「你係金牛座，好硬頸，見你呢排條頸有事，好唔好送嗰啲按摩肩頸俾你，初初係咁諗，不過都係唔好，好似賣廣告咁。」於是他改變主意送「人肉按摩」，「都係改送現場幫你鍊一下！」接著兩人合唱沒有派台的《有一種傳說》，其間家謙突爆出一句：「其實你自己有時都會以唱㗎喎。」
ADVERTISEMENT
立即更新/下載AM730手機APP 體驗升級功能
