源興隆麵家：石塘咀皇后大道西453號地下 電話：2819 8269
上篇去了西營盤搵食，今次跳到西環另一區石塘咀尋味。石塘咀的位置是屈地街、山道及大道西交界，上世紀是尋花問柳勝地，而今日是我食薑蔥撈麵的好地方──源興隆麵家。
五十年代的綠皮牌檔，後搬入現址，所做的麵食都是遵從六十年前的風味。老店的牛腩粉、魚蛋粉做得十分出色，但偏偏最簡單的薑蔥撈麵，使我念念不忘。坊間沒有幾多間舖做此下價麵食，相反老店仍做得精細。
薑和蔥切成絲，和麵一樣幼，薑絲浸水的關係，食落仍爽脆微辣，蔥味不嗆喉，特別是蔥白段非常香。令我喜出望外是麵沒有鹼水味，老店選用西環另一老字號添記的幼麵，條條銀絲，彈牙爽口，配上薑絲和蔥絲，好食！上枱前，師傅淋些熟油及甜豉油，更添香味。每次看人食撈麵時總先喝完這小碗湯，其實這湯是使撈麵帶點濕潤，以免乾身難食。小店用大地魚加蝦殼熬湯，淡鮮，沒有味精，加些韭黃更正！其實各位可以自己試做，簡單材料，不想食生麵可改用蝦子或瑤柱麵，最重要把薑和蔥切得幼，還有必落熟油。老店其他名物有灼墨魚鬚頭及牛腩粉，燜牛腩的膽汁已用了幾十年，確積聚了濃濃精華，我想用作撈麵定必一流。另外炸魚皮算不錯，保持脆身之外又不過火，不太鹹，不太硬，有少許魚味，一邊食撈麵，加碟脆口魚皮，再加支可樂，這頓午餐過得逍遙。
逍遙的不只得我一個，還有老闆與老朋友談往事、刨馬經、食魚皮、飲啤酒，這種生活確是快活，人在這急促的都市工作，都想有休息時間，我的休息方法是去街市、揀食材、看眾生、嗜自煮。
源興隆麵家：石塘咀皇后大道西453號地下
電話：2819 8269
四處搵食，尤喜懷舊食物，愛好下廚，搵人做白老鼠。