講開商場優惠，港鐵旗下的德福廣場呢兩個月引入多間新食肆，於是順手搞了一系列推廣活動，包括於場內大派「美食‧任你揀」優惠券至7月底，等你以優惠價試下新嘢。而去到8月31日，仲有一個「去 Shopping 送回程」優惠，逢星期六、日，憑即日單一消費滿600元的單據，可以換領即日港鐵車票，在九龍灣站入閘免費乘搭港鐵任何車程一次（機場快綫、輕鐵、東鐵綫頭等、往來羅湖及落馬洲站、港鐵巴士及港鐵接駁巴士除外）。
至於「快樂獎賞大抽獎」，同樣要即日單一消費滿600元，就日日都可以參加。四個大獎分別為衣、食、住、行而設。最吸引的當然係可搭足 365 日的「全年任搭港鐵」獎賞，得獎者可以獲一年內無限次免費乘搭港鐵（包括機場快綫及東鐵綫羅湖、落馬洲普通等車程）、輕鐵、港鐵巴士及港鐵接駁巴士的特別個人八達通。