先睇下美帝。民主黨初選，開始入彎，估唔到桑德斯老而彌堅，居然響星期二的初選電視辯論之中，安然無恙，任由其他參選人攻擊而沒有失去方寸。咁搞法，難怪有評論家覺得，睇完之後，最大嘅贏家，就係……侵侵！好易明啫，桑德斯一直俾人話係「社會主義者」，即係極左(響香港來講，桑德斯的立場同香港白鴿黨差唔多而已)，咁美帝選民又點可能揀一個極左嘅總統候選人呢？至於拜登？forget it。
肺炎疫情也與政治相關。
美帝總統選舉，有評論家話，只睇三樣嘢：武肺疫情、攬炒邊緣嘅股市以及失業率。當中，侵侵玩緊武肺。只要你睇下霍士新聞，佢地都三百六十度講緊歐洲疫情，以及美帝的反應：即係點樣嚴陣以待。侵侵啲支持者，開始借疫情拋出幾個深水炸彈。一個係批評北京點樣隱瞞疫情，一個係批評外國搞唔掂，一個就係美帝響必要時，係唔係需要封關呢？最後一點，其實幾risky。因為美帝如果真係玩加強收關，首當其衝嘅就係針對北方強國。佢地目的係操弄美帝人民，借疫症的恐懼，加大佢地反中的心理。而一向立場反中，鎖國英雄嘅代表侵侵，做埋抗疫英雄，梗係當之無愧。來緊睇下美帝點樣借疫情反中啦。
來到歐洲，疫症殺入去意大利之後，勢如破竹，一舉感染整個歐洲，無一倖免。部分英國佬幸災樂禍，因為佢地依家脫歐，有自主嘅出入境政策，必要時可以對意大利人加強封關云云。歐洲人防疫意識同香江好唔同。佢地會覺得香江係口罩之都，真係傻更更。依家好明顯感受到壓力，人民一見到武肺殺到，好似食咗慚愧波板糖，依家個個戴上口罩。留意下其他歐洲各國，佢地嘅確診嘅，往往都係一啲曾經去過意大利北部嘅人。歐洲國家頂唔頂得順呢個浪呢？老實，佢地好耐未試過面對一場咁大規模嘅疫症，而普遍歐洲人嘅衛生同防疫意識，至少同香港比較，真係不相伯仲，有時仲差啲啦。怕未？
星期二武漢早上又話俾境外人士經申請批准，可以離開武漢，跟手下午又否認嘅，係未？真相大白了。原來係因為當日早上，要安排來自台灣嘅血友病患者，可以依法申請離開武漢。跟手血友病童同佢媽媽就飛車去成都，再響成都坐飛機去台北。大家唔好忘記，台灣雖然有「封關」，但都冇完全封晒同北方大國嘅航班嘅。
人地English Choi點樣處理呢單嘢，做得好唔好，唔係好關我地事。但係，事後爆出來嘅係，因為呢單血友病童嘅事件，令到北大人被迫都要同English Choi作官方接觸，然後兩邊終於傾掂數搞定。如果真係咁，呢單嘢會有幾大嘅突破。咁又係，去到呢個真正嘅人道主義問題，北大人都唔想俾人批評見死不救。至於English Choi，政治上又贏一仗！
倫敦大學亞非研究學院法律系博士