切完又割

香港政治其實幾過癮。舊年三月，有人贏咗選舉，意氣風發，同記者關係如魚得水，一副改革者形象。唔夠九個月，記者唔敢見，頭馬被射低，民望復急跌，唔單止打回原形，仲要輸突，醜怪呀！

領袖頭馬墮馬，個個依家開始同頭馬玩切割一時又話請假應該要有時限(早又唔講？)一時又話一年前已經知道佢生意唔得(嘩！你咁早知又唔講，莫非晨早做咗政治散貨？)政治不嬲都係跟紅頂白，你點知幾時幾日事情會發展成點？如果依家唔開定路搞切割，到時真係出現政治負資產要散貨的時候，隨時會被政治流彈所傷。

領袖之民望如插水般一直下跌，有唔少人認為，同港英政府餘孽有莫大之關係。又有人話，佢施政唔得，原因係身邊無朋友。但無朋友咪出去交朋結友啦，而且港英餘孽，只能被動地防，難以主動地攻，因為若果按親北京人士之最低之中嘅最低標準而將社會人士分清敵我的話，成個政府至少有一半公務員要被炒，咁對施政衝擊仲大。

民望如浮雲，有升必有跌。但依照港大民調，呢位領袖有一次幾乎可以反升，但好快就跌咗落嚟，咁樣落去，真係跌到連一般扮唔鍾意政治，實際怕社會動亂之所謂中產，都唔願意支持，真係腳痛都唔出奇。

不過，依家研究Hello Kitty領袖之死因，言之尚早。坦白講，佢可以蟄伏十幾二十年而只係一心一意，齊心謀住領袖呢個位，忍受方方面面之嘲諷，一定有佢嘅過人之處。但係，有一樣嘢好緊要：一般政治分析都話，政治領袖往往響上任之時，會有一段蜜月期，俾領袖可以大刀闊斧，發揮所長，贏取民意。以美帝總統為例，講緊嘅都係上任頭一百日左右。而Hello Kitty領袖舊年七月嗰陣，一樣有人用上述之分析框架去睇佢，但係實際上，佢又有冇呢個蜜月期呢？

得閒睇番港大民調嘅走勢，似乎唔係呢一回事。響領袖七月上任，一路殺到入去舊年九月中，佢嘅支持比率係一直下跌，跌至十月第一個禮拜至喘定及倒升番。換言之，佢頭三個月，市民支持一直流失。不過，十月之後，佢嘅支持比率顯著彈升，當中原因包括擱置咗國民教育科、海難善後以至最重要嘅打擊樓市措施。特別係打擊炒樓方面，不單只令民情指數爆上，而且又令政府享受到少有嘅民望支持，而響十一月中更有機會扭轉劣勢，支持同反對之百分比去到一半半咁滯。

事後孔明，響十一月，當Hello Kitty領袖無辦法逆轉走勢之後，佢嘅支持及反對比率開始又回復喇叭形走勢。而且當個裂口一開之後，基本上佢嘅反對比率都係一浪高過一浪。至於佢支持嘅支持位一直都係響30％，直到對上一次嘅調查，即係五月尾，終於跌破咗呢個支持位。點解會咁呢？(二之一)。