主體意識

華叔當年講過，保釣一定要搞，因為係一次愛國旗幟的爭奪戰。所以，民主派響九七年前搞保釣，骨子裡(假設佢地個個都真係為理想)都係一種愛(中)國之情懷響度，而唔係純粹一種選舉操作。

不過，假如佢今日泉下有知，隨時會激到翻生，因為晚會連(中)國都唔愛，咁樣不如正名叫做「香港市民支援中國民主運動委員會」，咁樣可能真正之名符其實。

民主派響中國論述方面，左支右絀，已經唔係第一次。例如，呢頭你話，香港係特區，響基本法框架下行事及制約，但轉頭又響支記嗰度叫結束一黨專政。雖然中國憲法冇話中華人民共和國係由共產黨一黨專政嘅國家，但中國憲法確立咗中共之執政地位，以及在呢個一中憲法框架之下訂立基本法。民主派唔可能呢頭叫人結束一黨專政，嗰頭就話要按基本法之法律條文辦事。體腦真係分裂。

所以，民主派建構一個新嘅中國論述係必要嘅。因為既然接受得，響呢個一中憲法框架下之基本法，咁樣叫人地結束一黨專政，好多激進泛民朋友未必啃得落。換言之，一係拒絕基本法，一係就結束一黨專政。依家香港局勢好清楚：北京響搞前海及準備在經濟方面大力滲入中國money、準備響香港經濟上換血，政治上利用基本法框架盡量對香港政府官員鍊盡啲，而另外北京又睇唔到有開放黨禁嘅可能。呢堆東西，同1989年嘅形勢已經好唔同。

另一個係面對青年來勢洶洶，主體意識覺醒之後嘅疑問相當大。我呢代同後生一代，對六四呢個話題各有唔同之睇法。但年輕一代嘅主體意識快速爆升之際，佢地眼中嘅中國，同我又好唔同。年輕一代本來係要接民主棒，但泛民好多人仲拿住枝棒唔俾，年年都話薪火相傳，舊年仲玩到有「哭腔」，咁又點樣吸引班年輕人呢？與其同哭腔搞埋一埋，不如跟一啲更激進嘅政團啦？

呢兩個問題，係當今泛民面對嘅兩大issues。人地左記之中國論述唔使多討論，因為佢地好易做：逢北京必撐，逢泛民必打。人地左記之吸引年輕一代上位機會真係多，送去美帝、北京讀多些書，再有啲三十幾歲送去立法會磨練下，形成左記青年之生活圈。建制年輕人可以舒服(相比泛民而言)選舉，無痛上位，泛民響兩方面乜都冇，仲要霸住個位唔放。

支記今次有國不能愛，查實係敲醒咗其他泛民團體嘅警鐘。面對選民胃口之變化，大抵泛民需要想一想，究竟有沒有更加好更完備之論述，改造泛民走向更自主，更強調主體意識的政團。呢一個工程好巨大，但唔做又唔得，因為可以預期，嚟緊2016立會，中國因素左右大局，到時泛民之對手，可能會用好多國族問題玩泛民。

不過，我都覺得幾灰。唔用「愛國不愛黨」嘅論述，泛民仲有乜嘢中國論述可以sell到俾年輕人呢？（二之二）