一個政府部門阿頭，有時又係職系阿頭，權力相當大。HOS喎，個個一定畀面。權力咁大，單靠制度制衡，係唔夠嘅，因為制度點搞都會有漏洞。例如有啲老細，升到最高位置，想裝修下個辦公室，換下塊地氈，改下個梳化顏色，一般都唔會有人嘈。之不過，如果搞到要搬晒成個部門去另一個地址，再改埋logo呀，搞幾個大型training camps，仲要加多幾個助理處長之類，隨時畀內部批評浪費，多數ban硬。
所以，點都要靠嗰個阿頭自律。只要阿頭「打鐵還須自身硬」，真係做到自奉儉約，即使表現平庸，亦唔會出亂子，安全退休。但係，一邊有人當部門係私藏烈酒，飲飲食食，另一邊有人響退休前勁筍自己下屬可以帶薪實習，咁樣嘅吏治，就唔可能由制度上可以監察得到，而係真係官員自身出現咗問題。
我地會問：呢啲咁高質素又不可多得嘅飲食人才，點解可以晉升到咁高嘅位置呢？升遷制度係咪出咗問題呢？職系阿頭一而再再而三有呢啲筍人又筍己的情況，要搞到事後見晒傳媒至知，咁樣嘅吏治出現咗乜嘢問題？公僕局又有無盡責去監察各職系阿頭嘅表現呢？
難怪紀律部隊工會班大哥，決定退出薪酬調整機制啦，因為公僕局依家管理力度不彰，簡單講，唔夠威信，於是個個職系阿頭可以各自各精采，鍾意點玩都得，當正部門係私人俱樂部。既然係咁，紀律部隊工會一於先揭竿，正式向公僕局「挑機」，睇下公僕局又有乜嘢能力，勒得住呢班所謂「失控」嘅工會了。如果紀律部隊班大哥得米，公僕局之威信再受打擊，佢地點樣去管治呢？
查實紀律部隊班大哥，嬲係好有理由。通常，吏治敗壞之其中一個最大理由，係因為政府管治出咗問題。政府呢十幾年，管治能力不斷尋底，搞到民怨好深。一個政府民怨深，示威越來越多，就需要紀律部隊出來幫手處理，差人自然首當其衝，食到應一應。
官員火爆絕對有理由。早前雙非婦闖關，居然要由入境處響各口岸用目測去分辨孕婦，好似唔係入境人員之原來職責噃！唔係紀律部隊嘅食環署，本來係掃小販，但無話要包掃低香ｘ力同法ｘ功嘅橫額噃，嗰班人惡爺來㗎，佢地嘅暴力反應仲勁過小販。類似呢啲嘢，明明係政治問題，應該由政客解決。但政客解決無方，就推畀執法人員，執法人員又無辦法，侷住執法，結果就做埋晒一啲同自己本業無關嘅事。佢地向公僕局反映情況，但信我啦，公僕局對住一班水平咁高、精神面貌咁強，自信心極大、自視咁高嘅政客同最高領袖，又點會有搏雞之力呢？隨時班政客搵北大人，大翻你轉頭都仲得。
既然係咁，紀律部隊率先挑機，一於開咗第一槍。不過最怕跟手陸續有來，不單紀律部隊班大帝，其他職系一樣會咁樣做。如果我是海事處員工，我一定會叫工會研究下要唔要支援紀律部隊同事，感同身受嘛！
咁樣嘅吏治，真係無眼睇。（二之一）
ADVERTISEMENT
立即更新 /下載AM730手機APP 體驗升級功能
