Ad Block Ad Block
生活
2020-06-12 04:30:00
日報

我和午餐肉的約定

分享:

上回我講到新餐肉,有讀者問我「咩嚟㗎」?Sorry,我一廂情願以為大家知我講乜。係嘅,唔係食素既朋友未必會知。簡單講,新餐肉即是香港人日日食開嘅午餐肉,不過唔係用豬肉做,係純素午餐肉,主要成分聽講係大豆、紅菜頭同小麥……係囉,都唔明點解呢啲嘢溝埋會變左一塊午餐肉,but what do you care?大家食咗咁多年午餐肉,你有冇問過其實係用嚟整?!中間有冇5%係豬肉?啲豬肉係點嚟?有幾多%係豬嘅by- products?營養價值有幾高?定係根本冇?So what?我哋咪又係食左咁多年!個個專家同你講食午餐肉冇益㗎,你咪一樣照食! 如果我同你講「新餐肉」好有益㗎,唔通你又會食咩?

所以唔好錯重點,你先唔好理佢係乜餐肉,最緊要你覺得好食,或者最緊要係「似」,似返一塊午餐肉,你食得返嗰種口感,食得返個感覺,對我嚟講,係同我一齊成長嘅感覺!我諗好多人嘅童年同我一樣:我一日一日長大,一日一塊午餐肉。

我去試食咗餐肉麵同餐蛋治。單純以一塊午餐肉計,煎到個面少少脆少少燶,色香就似到十足十。味道就九成似啦,唯一最大分別係「真餐肉」其實係腍身啲嘅,呢塊「新餐肉」可能太有咬口啦,當佢同炒蛋放埋一齊,夾喺麵包中間,個combination就真係一流!絕對唔輸俾傳統嘅餐蛋治!激似度達99%!

Ad Block

咁你可能問,做咩要咁辛苦夾硬去搵舊「假」嘅午餐肉改個名做「新」餐肉去取代舊嘅午餐肉?對我嚟講,總之一句到尾!係愛呀!你試過食嘢食出愛未?以後改食新餐肉,然後同自己講你救左唔知幾多隻豬!你就會發覺塊午餐肉裡面冇肉汁但有愛!好味好多㗎!

請接受以下私隱政策及免責聲明,以示你同意am730內之私隱政策及免責聲明。了解更多
接受