雖然Jennie喺亞洲見粉絲嗰陣，成日都俾人話佢「臭臉」，不過完全唔影響佢喺各大品牌心目中嘅地位。除咗Chanel之外，adidas都係佢合作咗好多年嘅品牌之一。
自2018年成為adidas品牌大使後，Jennie終於推出首個個人聯名鞋款！今次就係Jennie x adidas Originals Superstar Square Ballet，將經典Superstar嘅貝殼頭設計變成芭蕾舞鞋款式，感覺比普通波鞋更加斯文、優雅，但又保留到adidas一貫嘅街頭感。
聯名芭蕾舞鞋款首曝光，就咁睇應該唔止得對鞋，有可能Jennie全身裝束都係聯名款。
最特別係，今次直接拎走鞋帶同鞋舌，改成一穿即著嘅設計，成對鞋睇落更加簡潔。鞋面用上柔軟皮革，配合闊身鞋口，再加埋同色彈性帶固定腳背，唔單止造型特別，平時襯衫都幾容易。目前就有黑、白兩款配色，兩隻都係超百搭嘅基本色，無論配牛仔褲、短裙，定係一身黑白造型都好襯。
細節位亦幾有Jennie味。鞋頭加咗一條皮革緞帶裝飾，令成對鞋冇咁重運動味，多咗少少芭蕾舞鞋嘅感覺。而Jennie專屬標籤同adidas三葉草logo就低調放喺鞋墊上，唔會成對鞋都印到周街都知係聯名。
鞋底亦係重新設計，加入人字紋同圓形紋路，睇落幾有型之餘，亦兼顧返日常著嘅抓地力。呢對Jennie x adidas Superstar Square Ballet暫定會喺9月1日正式發售。至於之後會唔會再有其他Jennie x adidas聯乘款，就要繼續留意官方消息喇。
ADVERTISEMENT
【特別送出🔥人氣新品 BX-49翔龍突擊 4-50 FF爆旋陀螺】
