比卡超升空做太空人！Pokémon歐洲太空總署聯乘。
講真，作為一個Pokémon迷，今個30周年官方周邊真係多到接唔住，明知又係周年聯乘、明知又係一輪買買買，我個荷包乾上加乾，但睇嚟又要跌錢，因為Pokémon今次竟然同歐洲太空總署(European Space Agency，ESA)合作，而且仲要係比卡超變咗太空人，實在太得意嘞。
今次合作配合10月4日開始嘅World Space Week世界太空周，Pokémon Company International聯手ESA，希望透過Pokémon將太空探索帶畀下一代，鼓勵小朋友對科學、太空同探索世界產生興趣。呢個概念其實幾靚，Pokémon本身就係一個充滿探索精神嘅世界，而太空探索更加係人類不停向未知出發。對小朋友嚟講，可能先係因為「嘩！比卡超去太空喎！」而感興趣，然後慢慢開始想知道太空人做咩、國際太空站係乜、宇宙究竟有幾大。所以今次真係有教育意義，唔只係搵個角色貼落件T-shirt度咁簡單。
但係教育意義歸教育意義，我第一眼見到隻太空人Pikachu，第一個念頭仍然係：買！。法國太空人Sophie Adenot早前真係帶住一隻特別版Pikachu公仔上太空，隨佢一齊去到國際太空站(ISS)，之後先返到地球。有埋呢一層上過太空的象徵意義，雖然買到嘅只係量產版嗰隻比卡超，都比一般的聯乘系列有意思。
Pokémon Center今次推出一系列聯乘產品，包括兩款身穿ESA太空人服嘅 Pikachu毛絨公仔、Pokémon TCG配件，以及飛行員外套等。ESA官方網店亦會推出Pikachu T-shirt、tote bag、記事簿同pin等周邊；而Pokémon GO當然都唔會缺席，世界太空周期間將會有特別遊戲內容，我日日都仲捉緊，心態上更投入啦梗係。
Pokémon同太空探索本身就有一種自然嘅契合感，Pokémon世界一直鼓勵玩家探索新地方、遇見新Pokémon、發現未知，同太空探索的精神如出一轍。見到呢隻著住太空人裝、圓碌碌、好似隨時準備「Pika Pika」然後一齊升空嘅比卡超，真係零抵抗力，睇嚟又要跌錢，唯有安慰自己：今次唔係亂買，係支持科學教育、支持太空探索、支持Pokémon 30周年……好啦，其實全部都係藉口，真正原因得一個：比卡超太空人實在太得意，俾我跌埋今次囉。