PATH╳櫻桃破｜兩個廚壇新丁的「胭醺雙城」 從十道菜讀懂後生仔的骨氣
最近與同行老友食飯，講起依家香港飲食業嘅市道，大家都不約而同嘆氣，最令人頭痛嘅唔單止係個市靜，而係「新血」難求。依家邊有後生仔願意入廚房？日做十幾個鐘、廚房又熱又逼、切親燙親係家常便飯，仲要由洗菜打雜做起，真係「苦工」一份。況且喺呢個網上批評咁廉價嘅時代，個個(喺網上)都係「食家」，一有少少失準或唔滿意就會被踩到一文不值，對需要時間磨練技術嘅後生仔嚟講，心理質素要非常強大先頂得住。
今次我就喺尖沙咀一間叫PATH嘅精緻小店，見證咗一場近期難得一見、極有誠意嘅「四手聯乘」晚宴。呢個叫「胭醺雙城」嘅企劃，由PATH嘅主廚莫均朗(Tony Mok)聯同深圳人氣創意料理「櫻桃破」嘅主廚姚軼楠(Ely Yao)兩位年輕人聯手炮製。Tony從土生土長到走進米芝蓮星級廚房，背後付出嘅汗水可想而知；而Ely畢業於上海藍帶，本身讀工程出身卻走入熱廚房，經歷過亞洲50最佳餐廳嘅磨鍊，同樣是一步一腳印。
老實講，依家坊間好多所謂嘅聯乘，不外乎係你出三道菜我出三道菜，拼埋一齊當新餐單賣。但Tony同Ely偏偏揀咗一條最難行嘅路——十道菜裏面，幾乎每一道都係兩個人由籌備開始，一齊試菜、一齊推翻、一齊重來，將法式精緻技法融入香港大排檔、圍村九大簋以至江浙風土風味之中。
PATH╳櫻桃破 Menu十道菜一氣呵成
好似一開首嘅檀暈妝明｜生薑菠蘿，Tony身為元朗圍村人，將圍村九大簋必備嘅子薑菠蘿解構，精雕細琢成一口開場小吃，清甜微辛，既有本土情懷又有fine dining嘅精緻。輕攏慢捻｜栗子燜雞，烤三黃雞肉質格外軟嫩，吸飽咗栗子嘅甜，襯底嘅雞湯蒸蛋滑嘟嘟，面層係雞湯蠔油松露泡沫，加上意大利Alba白松露薄片受熱後發出嘅陣陣幽香，妙到毫巔。香醪杯深｜烤鴨酒釀燒亦好精彩，14天熟成嘅廣州米鴨皮脆肉嫩，配上發酵杏脯梅乾辣椒醬，Ely嘅酒釀餅底好似食Taco咁包住食，酸甜解膩，令人拍案叫絕。芳心絲亂｜鹹檸檬蒸魚用咗主廚自醃嘅鹹檸檬，酸度剛好帶出清蒸紅鮋魚肉嘅鮮味，加上金黃細密嘅南瓜泥溫柔襯底，旁邊配菜亦帶點炭香，整道菜風味平衡度極高。仲有向大排檔致敬嘅笙歌醉夢｜鬼馬牛肉麵，將避風塘蒜酥油炸鬼拌入濃郁嘅牛肉麵，淋上少許木薑子油甚有畫龍點睛之效，嗰種檸檬與香茅嘅複合香氣，將草根美食昇華到另一個層次。
Menu食落去，由頭盤到甜品爛嚼紅茸｜芋頭千層，起承轉合流暢到好似由同一個人編排咁。呢張餐單背後，兩個後生仔到底熬咗幾多晚夜？試咗幾多次味？睇住兩位在板前忙得不可開交、眼神卻愈忙愈堅定嘅年輕廚師，後生仔怕辛苦唔肯入行？或許只係吾輩old seafood嘅過慮。
Path
九龍尖沙咀金巴利道68號1樓A號舖
5275 8881
Tasting Menu $1,380起
