今個禮拜，土下座因為上年聖誕到新年自己放咗自己成個禮拜假，搞到好似仲未慣做嘢咁，認真弊！好在遊戲界冇我咁懶，2017年開始冇幾耐，已經要準備迎接好多活動同新聞，先唔講月中嘅台北遊戲展，因為到時土下座都會去睇，先講咗任天堂喺聽日就會舉行嘅新主機任天堂Switch發布會先！自從上年公布後，唔少人都對呢部任天堂新機好有興趣，好想知會好似Wii U咁仆直？定3DS咁再創奇蹟？英國零售商GameSeek率先公開咗呢部主機會喺3月17日發售，價錢係199英鎊，即大約1,800港紙，其實算非常吸引！不過，千祈唔好咁快老定住，因為相信呢個價只包括主機一部，主機座呀手掣呀之類周邊可能全部係錢，個人認為，如果最終都係要$2,500左右，就好難搶到PS4同Xbox One市場，大家又點睇先？