Apple發表iPhone 11嘅同時，宣布Apple Arcade會隨iOS 13推出，只要每月俾大約50蚊港紙，就可以隨時用Apple嘅產品上網打機，首發遊戲更超過100隻，當中更有Capcom及Konami開發嘅獨佔作，雖然首發區域似乎未有香港，但推出都係遲早嘅事。Apple推雲端遊戲平台有冇得做？土下座唔想講到好死，但想解釋俾大家聽，其實Apple已經一早ready。事實上，雖然Apple向來都冇好聚焦解釋佢地嘅CPU，但由iPhone X嘅A11 Bionic開始，iPhone效能表現已經超越所有手機成龍頭，而今年兩部手機齊齊換上A13，效能更可以用「碾壓」形容，單講跑分，「機皇」Note10就連上一代A12都未追到。得一百幾十字當然唔會解釋到Apple嘅CPU點解咁勁，但其中一個簡單原因，係佢地幾年前已強迫開發者要用佢地自家嘅Metal API寫程式，令Apple產品嘅軟體更貼近佢地嘅硬體，大幅提升到圖像處理運算效果。內功配合外功呢樣嘢從來唔新鮮，遊戲界龍頭任天堂一直都係箇中好手，因此土下座覺得，未來Apple都唔會想進軍或干涉所謂「遊戲界」，戰略反而會幾似任天堂，以輕度玩家為主，即係你可以買PS4又同時買Switch。所以諗諗下，如果Apple Arcade成功，第一個受影響嘅咪就係任天堂？