木薯資源早前發盈利預喜。圖為公司年報。
木薯資源(841)已經發布咗半年成績單盈喜，喺祖國糧食安全同環保兩大重要政策下，相信木薯全年度成績單，一樣好靚仔，有煲佢嘅價值。
木薯係全泰國最大木薯片採購同出口商，兼且係內地最大產品進口商。該集團啱啱發布無耐，話去到今年9月底嘅半年度成績單，增長理想，全因為「客戶需求強勁」，呢一點好緊要。
又家陣祖國以糧食安全做重中之重國策，包括玉米呢類基本糧食，已經排除用作環保燃料乙醇嘅生產，取而代之，包括木薯，就用嚟作環保燃料用途。再講，嚟緊兩年，先係乙醇廠房落成高峰期。單係呢個point，已經俾木薯一個長搵長有嘅穩定渠道。咪扯咁遠，據泰國智囊組織「開泰研究中心」預測，今年泰國木薯條出口，會增加33%，到貼近100億港銀。真係好保守計數，當木薯本年度純利增長30%計數，去到1.5億銀，就算連埋配股攤薄全面反映，預測市盈率(PE)都係得5倍。
又木薯前排話購入掌舵朱銘泉酒店物業，2.24億銀嘅收購代價，全部係以發行新股支付，每股配股價0.831元。又連埋冚配股計，大股東權益，由先前50.15%，變相增加到61.66%，街貨係一股都無多到。朱生寧願要貨，亦唔要攞現兜兜現金，亦側面印證到，對木薯前景係點。煲木薯，現價(1.24元)翻半番到1.86元計數，今年度預測PE，仲未上到10倍雙位數。
作者為中細價股專家