英超今夏頭10位「大刁」暫時全部係中前場球員。位置踢最後已係阿仙奴新防中蘇比文迪，紅軍攻中科利安華迪斯暫時係標王，善打前面三個位嘅新兵仍佔大多數，市場上搶手，叫價最高。
唔好以為只係Big Six先有錢擴軍，單計每年跟排名分錢嗰筆獎金，盟主紅軍上屆執1.7億英鎊，比包尾嘅修咸頓只係多6,500萬英鎊。20路英超大軍都花費得起，只係近季升班馬入貨冇乜好貨色，上季令人印象深刻得一位葉士域治嘅箭頭利安戴納，一季轉手賣俾車仔升值五成；但升班嗰3隊最終全部回降，夾埋成季聯賽入95球，比紅軍僅多9球，火力弱得可憐。證明升班馬要保命，汲取其他球隊近屆失敗經驗，揀啲識入波、經驗足嘅即食前鋒；勝過大換血，甚至連英文都未識講嘅一班英超新人類返嚟博一鋪。市場上仲有唔少經驗豐富嘅待業前鋒，人工唔平但短期合約踢得返英超，對佢哋仲有吸引力；包括38歲未言退嘅占美華迪、32歲丹尼艾格斯同28歲卡維特利雲，老中青三代自由身英超箭頭，分分鐘變護級救星。