唔經唔覺西班牙盃已經去到16強次回合階段，今晚有場不俗戲碼，由基達菲主場對馬體會。馬體會首回合喺主場以3比0大數基達菲，只要今場穩打穩紮，晉級機會高唱入雲。基達菲近況認真一般，聯賽加盃賽連續5場未贏過，幸好主場仍有少許保證，曾經喺聯賽擊敗過皇馬及馬拉加等前列球隊，主場實力不容忽視。
馬體會上仗有多位主力停賽，最終作客被馬略卡逼和1比1，由於首回合領先3比0，今仗未必會全力以赴，或有機會留力聯賽。佢哋今季主客表現判若兩隊，聯賽主場9戰全勝，仲勁過巴塞，但作客勝出率只得44.4%。對賽方面，馬體會近6次到訪基達菲，錄得2勝2和2負成績，絕無甜頭可言，預料今仗主隊可保不敗，但難逃出局厄運。