帽子戲法真係咁easy？這邊廂C朗第23次「戴帽」，刷新西甲紀錄，另一邊廂美斯又表演連中三元，兩位大哥真係不遑多讓。喺西甲，C朗多美斯兩次帽子戲法，但以全部賽事埋單計數，美斯總共29次「戴帽」，又多番C朗兩次。
表面數字未必反映到現實，一齊數據睇真啲啦！C朗喺23場連中三元嘅聯賽中，有15場射入12碼，其中有3場仲入兩粒；美斯就喺21場聯賽中入咗3次12碼，即係含12碼比率分別係65%同14%。12碼係極刑，射入機會率比普通射門高好多。C朗23次西甲帽子戲法，皇馬全部贏波，而美斯21次戴帽就助巴塞20次勝、和1場。換言之C朗博多啲12碼，有助提高入球數字同球隊爭勝率，策略上勝一籌。