今晚西甲有場獨腳戲，由希杭主場對基達菲。希杭近況認真不濟，近6場聯賽只係贏過升班馬拉斯彭馬斯，取得1勝5負劣績，處於下游位置，若不積極搶分，大有機會降班。佢哋最大問題係攻力疲弱，近6場聯賽有4場食白果，平均每場入0.93球，雖則今仗有後衛比拿度辛尼加及路爾斯靴南迪斯停賽期滿復出，但只係增強防線實力，對攻力並無幫助。 基達菲近態尚算平穩，聯賽加盃賽連續4場不敗，取得1勝3和，略嫌和波太多，只領先希杭兩分，暫列中下游位置。佢哋今季全部贏波來自主場，作客至今仍未開齋，平均每場入0.62球，卻失2.5球，係西甲作客成績最差球隊。 對賽方面，基達菲近6次到訪希杭，錄得2勝1和3負唔算太輸蝕。兩隊排名咁差，可謂各有缺點，絕冇贏波把握，大有機會握手言和。