今晚上演另一場歐聯4強首回合賽事，由多蒙特主場迎戰皇馬。兩隊喺今季分組賽交過手，多蒙特取得1勝1和，最終以小組首名晉級，但係分組賽同淘汰賽分別好大，加上季初皇馬狀態一般，未必可以作準。多蒙特近況唔錯，聯賽加盃賽連續7場不敗，取得6勝1和，相信聯賽可保住「二哥」地位。佢哋上一圈對住馬拉加都贏得好險，去到補時憑一個問題越位球，險勝3比2晉級，但整體發揮一般，絕對可以用好運去形容。皇馬剛喺聯賽以3比1擊敗貝迪斯，目前落後巴塞13分，唯有寄望西班牙盃及歐聯。佢哋上一圈面對土耳其嘅加拉塔沙雷，首回合主場輕取3比0，但次回合作客有啲輕敵，最終以2比3落敗，但兩回合計仍以5比3晉級。兩隊殺得入4強絕非泛泛之輩，論歐洲賽經驗皇馬略為佔優，但係多蒙特主場亦絕不輸蝕，唔排除會和波收場。