英超藍朝或不換代

曼城圓夢，但今屆喺英超Big Six對戰表現唔突出，勝在鬥班次唔同嘅對手，甚少失拖；喺歐聯同樣出現嘅情況，最終受制皇馬，就算嚟緊捧到英足盃，都唔算完美嘅一季。藍月近年成眾矢之的，來屆隱憂再多，首先個別主力挨近甚至已逾30歲，要多補充優質新血，加強活力；掌舵人哥帥去向未明，更有財務違規115條，最快來季季中後判決，其餘傳統列強必具更大決心破佢壟斷。 

阿仙奴連續兩屆做「二奶」，未算慘情，98/99年起曾連續3季輸俾曼聯，先可再嘗封王滋味；球隊今屆買到懷斯，戰力升呢，但隊波後備兵麻麻，冇正宗射手，夏天有冇預算可以用多1億鎊買星將，破21年聯賽捧盃荒呢？利記來季換帥即變一大問號、曼聯仲諗緊留唔留「坦克」，熱刺一向係Big Six問題最多，反而車路士季尾發力，踢到歐協聯當大獎，高層唔會理盤數將來點埋尾，一定堅持重金挖所謂全世界最好嘅年輕球員策略；以藍戰士今屆季尾傷兵潮減退後嘅勁勢，主力平均年齡又係列強最當打，來屆英超「藍」朝或不換代。