電玩始祖，紅白之路(上)

每逢佳節倍思親，皆因姑丈是電腦人。每逢大時大節，聖誕、復活甚至農曆新年，我等表弟、表妹、表哥、表姊，總是眾在一起，到新婚的姑丈家玩電腦遊戲，坐在書枱旁的單人床，六、七個小矮人輪隊享受電玩的滋味。

三十年前玩電子遊戲當然要用大電腦，印象中有Intel 8088 CPU、32MB Harddisk加唔知幾多十K的Ram，配合14吋的綠色大螢幕(指體積)。磁碟開機，進入Dos，只是知道幾隻薄薄的5.25吋大磁碟進出，入碟Lock掣，綠燈著代表Run緊，仲有「笛、笛」聲作提示音。聲音停止，綠燈熄滅，就到入第二隻碟。就是如此，開展了人生首個的半通宵，自始通宵便與電腦、電子扣上關係，不是自己一個人匿埋整電器，便是幫人維修電話。

電子遊戲，樂趣無比

現今電腦遊戲有好多種，但記憶中姑丈給我們玩的就只有「撞磚」和「火鳳凰」。排住隊一個死咗便輪到下一個，快活不知事日過，開心等待人數不會嫌多。不過人大咗，始終都是單色Mon，加上朋輩之間興趣開始多，琴棋書畫又砌模型，電子遊戲自然欠缺吸引力。

直到突然有一天，「任天堂家庭電腦遊戲機」的出現，這股紅白之風使到香港變天。以往每日放學只有配上廣東話的日本卡通，返學時英文默書亦多數漏空，但因為這些電子遊戲，個個都好似變成英文、日文的專家般精通，當然其實只是習慣了螢幕上問題的答案，Yes、No和Option。

紅白主機，家中必備

其實「任天堂」很早已經推出了手提的電子遊戲，例如過橋抽板和King Kong。及至1983年推出接駁電視的「紅白機」Family Computer，自始「上下左右、A、B、Select、Start」便伴隨成長，影響一生。「紅白機」雖然自稱家庭電腦，但掛羊頭骨子裡大家都知道是電視遊戲，適逢香港家庭收入開始穩定，一千幾百，有如等閑。加上子女猶如家長手中的明星，更何況是可讓大家一同在家中招呼親朋大玩特玩，可作「講故事」和睇電視劇的以外的消閒選擇。

當時和家人每逢經過淘大商場，眼見總是人來人往，「出機、抄Game」的店舖總是開到成市成行。當時自己冇，只好投靠鄰居友好。所以每逢星期六，總是會到同村同學屋企，睇人玩《炸彈人》、《1943》、《魂斗羅》和《孖寶兄弟》，當然還有一些永遠打不爆的21點和色情酒吧。

技不如人，敗感遺憾

數年後終於人有我有，水貨主機、磁碟機和一個機mount，當然還配置合香港電壓的一出二火牛，加埋改機可玩「盜版」又收兩、三嚿，如是者都成千幾二千蚊落樓，在此真是多謝父母肯買給我和弟弟，叫我們總算曾經擁有。但原來自己打機遲起步不及同學超勁的手眼協調，並且因此還訓練出近視，在強大挫敗感之下不再戀上這電子玩意。

多年風塵一邊，相信磁碟機也早已報銷，直至十多年後，在羅湖商業城五樓，看見甚麼「104合一遊戲」盒帶之物，叫我重拾回這失去了的那些年……下期續見。

興趣多而尋究底，愛藏物並擁思人。七十後，舊情尋。電郵：[email protected]