炒魷魚遊戲2：高空繫穩安全帶，失足不致「無屍骸」
來到「魷魚遊戲」中的「玻璃橋」挑戰，參賽者須按抽籤次序，限時穿越一道由兩排強化及普通玻璃板，隨機編排而成的懸空橋樑。每步須選擇踏上左或右的玻璃板前進，強化玻璃板可承受二人重量，但普通玻璃板則一踏即碎。前行者可謂「行先死先」，後隨者卻愈後愈有利。編號456的參賽者，本身是骨科醫生，幸好排在隊末，與前面的一位地盤工人，一邊如履薄冰地過橋，一邊討論職安健。
「工友，依個遊戲就話冇任何安全措施啫，但你平時喺高空工作，有冇一時貪方便，唔戴安全帶㗎？」
「醫生，我話冇你都唔信啦！不過當年我有份起港珠澳大橋，聽講判頭為咗趕工交貨，疏忽咗安全監督。結果發生咗好多工業意外，死咗好多工友，搞到各大傳媒都封佢做『奈何橋』！但係承建商只係俾法庭罰得嗰少少錢，完全起唔到阻嚇作用！之後我就好着重戴安全帶，始終條命仔係我自己嘅！」
「高處墮下嘅工友，唔好彩嘅就當場死亡，執身彩嘅就有命送去醫院，但通常都已經多處骨折、內臟出血，甚至脊椎受損，變成永久傷殘。諗起之前有個搭棚工人，因為狗臂架螺絲鬆脫，由兩層高跌落嚟，骨盤骨折加埋小腿開放性骨折，結果要倒返轉由我幫佢『搭棚』：即係先用外固定支架去固定骨折，等到佢情況穩定，再做內固定手術。」
「話時話，我都試過工傷㗎，喺1米平台度跌落嚟，屁股同背脊落地，搞到腰椎間盤突出，嗰次都醫咗大半年先至開到工。」
「聽講法例規定2米以上嘅高空工作，先至要戴安全帶，但你哋應該仲有其他安全措施，例如係加設圍欄，同埋用工作平台㗎？」
「你問我，不如去問吓地盤嘅安全主任啦！咦⋯⋯前面嗰幾個參賽者，咪就係早排出事，死咗好多工友嘅塌天秤地盤嘅二判、三判，仲有承建商董事？」
「如果當初佢哋喺職安健方面做到最精進，就唔會俾勞工處勒令停工，被死者家屬入稟起訴，依家就唔洗輸到要玩『魷魚遊戲』嚟博翻身啦！」
「自從建造業輸入外勞，搞到我哋工友開工不足，我都想炒依班老細魷魚好耐！呢鋪輪到佢哋焗住冇得戴安全帶過橋，仲唔係風水輪流轉，現⋯⋯」工友的話尚未說畢，前面就立刻傳來玻璃破碎聲，以及淒厲的尖叫聲。
「唉！總之一句講晒：負責『修橋補路』嘅工友，就算窮一生汗水，都賺唔到條『金腰帶』嚟戴，亦唔好嫌麻煩唔扣好安全帶。唔係嘅話，每日開工就好似冒死行過呢條『玻璃橋』咁，隨時會跌到粉身碎骨『無屍骸』！」
「講得啱！我開工當咗安全帶係『金腰帶』㗎喇！」
作者為骨科專科醫生