炒魷魚遊戲3：被AI搶飯碗，換來手腕不再勞損？

終於來到「魷魚遊戲」中的最後一關：「空中魷魚遊戲」。參賽者須順序站在三座分別為正方形、三角形和圓形的高台上，並在限時內將至少一名對手推下，其餘的生還者才可晉級到另一高台，直至最後的倖存者，方可獲得巨額奬金。編號456的參賽者，本身是骨科醫生，與一群飲食業員工和老闆，正經歷一場生死存亡的人性考驗。

當大家站在正方形高台上，商議應該淘汰哪一位時，查老闆首先開口：「飲食業員工，不嬲都係工傷同職業病嘅高危一族。好似負責樓面嘅群姐咁，日夜做唔停手，結果患咗腕管綜合症，依家連執枱收銀都慢半拍。既然我間茶餐廳引入咗送餐機械人、QR code落單同埋自助收銀機，咁我就唔使再請佢啦！」說罷，查老闆便走向群姐，正想把她推下去。

「咪住！腕管綜合症其實有得醫㗎！腕管係手腕裏頭嘅一個狹窄通道，由腕骨同横腕靭帶構成；喺通道裏面，有正中神經同埋屈指肌腱經過。如果雙手成日做重複用力嘅工作，肌腱同横腕靭帶就會發炎同增厚，令到腕管裏頭嘅壓力增加，正中神經就會受壓，手指就會麻痺同無力。只要適當休息、戴手托、食消炎藥同埋做物理治療，病情通常都會得到改善。若果病情惡化，接受腕管鬆解術就可以根治，真係唔使吓吓就炒魷魚㗎！」雖然醫生出言阻止，但由於群姐雙手麻痺，無力反抗，結果被查老闆推下去。

當抵達下一站的三角形高台後，查老闆又再虎視眈眈他的另一位員工：「佳叔！上次你喺廚房跣親，用手撐落地，結果手腕骨折要打石膏。到依家病咗幾個月都仲未返工，我估你之後連揸鑊鏟都無力，炒唔到碟豉椒炒魷㗎啦！我已經喺廚房裝咗炒餸機械人，加上用埋預製菜，唔使再靠人手切，連切親手指嘅機會都變為零，咁你以後就唔使再返嚟廚房啦！」說罷，查老闆便走向佳叔，正想把他推下去。

「咪住！頭先我同佳叔檢查咗，佢應該係唔只有手腕骨折，仲有三角纖維軟骨複合體(TFCC)損傷。TFCC喺手腕近手指尾嘅尺側，負責穩定腕關節。如果因為跌親而扭傷手腕，導致TFCC撕裂，就會出現手腕尺側痛、僵硬同無力，郁動時或者會發出聲響。簡單照X光係check唔到TFCC有冇撕裂，要照埋MRI嚟確診。如果經過一輪保守治療，甚至打類固醇針都無明顯改善，咁就要接受微創手術，喺腕關節鏡下修補或清創撕裂嘅軟組織⋯⋯」然而，因為醫生解釋得太長氣，加上預計受傷員工復康需時，查老闆便亳不猶豫地將佳叔推下去。

最後站在終極圓形高台上的，就只剩下查老闆和醫生。「醫生，既然你咁濟世為懷，不如你自己跳落去，捨身成仁啦！」「你個連鎖飲食集團，久唔久就執咗、改名、再開返！依家仲炒晒啲員工魷魚，轉用AI，雖然可以慳返人工，但食客一定覺得你啲餐廳唔好食，因為用AI係煮唔出人情味！」「我執10間，開返16間，又有破欠基金包底，做生意係咁㗎啦！依個世界，弱肉強食，適者生存，有咩問題呀？」查老闆說罷，便向醫生撲過來⋯⋯(本故事完)