ViuTV原創劇《日落下的彩虹》一出街，反應十分熱烈，網民日日追住睇，社交平台上有好多正評。唔少人都讚劇情貼地，好有共鳴，更有人直頭話好耐冇追過港劇。老實講，套劇冇咩大卡士，亦唔係有咩驚喜橋段，但可以贏得咁多掌聲，我認為有以下三個成功元素。
一、係劉偉恒導演。佢之前拍過「起跑線」系列，已經幾受歡迎。ViuTV冇固定嘅電視劇班底，反而敢用新幕後團隊，甚至搵電影導演嚟拍電視劇。劉偉恒就係好例子，電影導演拍電視劇，往往更注重鏡頭美學同劇情節奏，亦突破傳統嗰種流水作業，令觀眾覺得成套劇更有格調，為觀眾帶嚟新鮮感。
二、真實場景帶來投入感。《日落下的彩虹》幾乎所有場景都喺彩虹邨真實取景，屋邨嘅格局、舊式理髮店同咖啡店等真實場景有種親切感，令觀眾覺得故事同自己生活好近，就自然更加投入。呢方面ViuTV可以話係「轉敗為功」，因為佢哋冇咁多錄影廠，拍劇唔可以依賴方便而且成本較低嘅廠景，真實取景就更容易打動人。
三、以本地觀眾為本。ViuTV劇集比較純粹，專注本地觀眾，冇咁多賣埠嘅考慮，劇情上可以講更多香港人嘅故事，選角上亦可以有本地不同平台嘅演員參與，好似今次呢套劇就用咗大家由細睇到大嘅甘草演員，同時亦有剛憑電影《爸爸》奪得金像獎嘅新人蘇文濤。觀眾睇到自己嘅生活、文化被呈現，自然會有共鳴。
《日落下的彩虹》講嘅其實只係日常家事，好多人都面對緊嘅情節，或者正正係因為咁，觀眾易入口，都易有共鳴。其實睇到依家，單元故事都係快樂收場，可能有人覺得有啲老套，相反播足差不多10年嘅TVB處境劇《愛．回家之開心速遞》最近大結局，並冇BBQ，而係以兩大家族女主角不和傳聞作結尾，都幾反高潮。
ADVERTISEMENT
【APP會員限定 amFUN積分加碼賞登場】
