誰代MIRROR上台領獎？

《叱咤樂壇頒獎典禮》又一年，MC張天賦同Jay Fung馮允謙各奪3獎，平分秋色外，仲有一個人都係上台三次、代喺澳門開騷而缺席嘅MIRROR攞獎，主持介紹佢係Makerville嘅「藝人管理、表演及演唱會業務副總裁」。齋聽title就知非等閒之輩，引起我好奇心，八下呢位Karen係何方神聖，仲得到一啲啟示。

綜合多方消息，Karen服務集團多年，之前係大國文化嘅總經理，負責演唱會業務，不過以前主要幫其他歌手做演唱會，直至《全民造星》後，集團多咗一班「親生」歌手，演出部門自然變得強大，加上MIRROR盛世，演唱會亦愈搞愈掂。以前Karen主要做演唱會同埋管理部分ViuTV藝人，集團最大資產MIRROR同COLLAR係隸屬另一條team，即係話搞佢哋演唱會都要問過藝人部先。由於演唱會業績蒸蒸日上，加上有人讚Karen數口非常出色，深得重用，近月公司將所有旗下藝人都撥入Karen個部門，花姐同阿Wing等大家熟悉嘅經理人都係向佢匯報，以後要任何藝人開騷，落個order就得。

公司重整部門就時有發生，但我覺得發生在MIRROR團隊就有啟示。MIRROR雖然有唔少fans，但近年喺街客方面確實難有突破，會影響音樂收益。以前就話可以靠廣告費幫補，但市道疲弱客戶都縮水。由一個做演唱會出身嘅高層管埋藝人，我認為反映演唱會業務會成為公司嘅主力——今年MIRROR第一次唔去叱咤，而過大海連做兩個騷搵真銀。

加上幾個鏡仔個人演唱會後，姜濤又即刻宣布有世界巡迴；又預告將有團con，2026年相信公司嘅演唱會會絡繹不絕。除咗演唱會可以帶嚟收入之外，圈中人又認為廣告收益公司同藝人拆帳比較多，但做演唱會好多時只需要一個定額演出費，相對公司嘅利潤有機會更大，當然要承擔嘅風險亦唔小。

對粉絲來講，多做演唱會，多啲親身見到偶像，都係一件好事，當然前提係要正價買到飛嘅。不過，亦意味呢班由免費電視捧出嚟嘅歌手，日後要睇佢哋表演都幾難再係免費。