誰是BRO

MIRROR四人小組FING新歌《BRO!》，用懷舊抒情曲風展現兄弟情，但因為製作班底曾經同隊友Ian捲入抄襲風波嘅爭拗，引起鏡粉強烈不滿，令歌曲背後嘅「兄弟情」反而成為爭議焦點。

FING小組由Lokman、AK、Alton、Frankie組成。一早預告會出歌，歌頌兄弟情，令粉絲好期待。歌曲嘅製作名單出爐時，發現包括陳考威與AP潘宇謙，就立即令部分粉絲發起罷聽。事緣另一位隊友Ian早前因為新歌《那抹柔光，名為你》被指與潘宇謙嘅《碎鑽星球》編曲相似而爆出抄襲風波，AP潘宇謙曾於社交平台發文，暗指有人未有實質付出，但就要求掛名「曲詞編監」。當時Ian公開反駁指控，甚至喺社交平台互相取消追蹤，兄弟情因此破裂。

有鏡粉認為，發生咁大件事，MIRROR嘅其他隊友應該全面杯葛，唔應該再用有關班底嘅作品，首當其衝嘅當然係同Ian關係最好嘅AK。但大家都知AK同時又與陳考威、潘宇謙交情深厚，可以話係「左手又係肉，手心又係肉」。有粉絲甚至將「槍頭」轉移到公司，認為首歌搵咩人製作，四子只係被動接受安排，未必有話事權。平日粉絲常批評公司管理混亂，但到咗呢啲時候，反而覺得公司有最大話事權，班仔冇得選擇，矛盾心態其實頗為諷刺。

事實上，早於抄襲風波爆發時，本欄已經寫過，無論誰對誰錯都好，希望大家和平共處，可以護主，但係唔好攻擊。點知依家唔只涉事人物，連身邊嘅朋友都被要求要「靠邊站」，呢個係唔係偶像想見到呢？廣東歌音樂圈喺依家呢個環境下已經極唔易做，仲要因為個人恩怨，而被團隊，甚至公司杯葛，而喪失工作機會，Ian自己都係唱作人，音樂圈講求合作與交流，我相信都唔會同意呢個風氣。

究竟新歌製作班底，FING小組係主動定被動，我相信記者會問佢哋。我亦希望會有人問Ian係唔係想隊友都封殺AP。執筆之時，我未睇到答案，但見到風波嘅起源歌曲《那抹柔光，名為你》將成為今年十一國慶煙花匯演配樂之一。世事就係咁。