老毛病

娛樂圈最肉酸的場面，不是台上有人講錯嘢，而是台下有人幫手補鑊，點知變出另一隻鑊。

就像193同經理人阿濟的公開摩擦。表面是《全民造星VI》決賽司儀臨時換人，保錡頂檔時訪問孝淵被網民鬧；實際上，真正引爆的不是「港式英文」，而是危機處理機制嚴重失靈：經理人想護航，結果適得其反變了「指控」；藝人要自保，唯有親自落場。最終，粉絲互相開火、團隊緊張氣氛被放大，仲順手宣告埋即將有新經理人，迎來這齣荒誕劇的最大高潮。

經理人發文話保錡是兩日前先知要頂檔，本意明顯是幫保錡擋刀，叫大家不要怪他，準備時間確實有限。但公關文字最怕就係這種：你覺得自己講A，觀眾就自動補完做B。於是網上就開始流傳另一個版本：193是否臨時甩底？是否累到隊友硬食？而193之後在留言區一句「唔好盡信經理人講嘅嘢」，又話自己最少6日前已經提出有行程問題，就等於當眾話經理人說法不準確，予人一種ERROR內訌的感覺。

我成日覺得，經理人的存在價值不是「幫藝人解釋」，而是「幫藝人避免需要解釋」。一個運作正常的團隊，應該早在風波出現之前就對齊口徑，將所有分歧點一一消除，而不是讓網民有空間再想像，令事件繼續發酵。事件中最搶口的一句，肯定是193說：「(經理人)如果有幫到，ERROR應該可以行得更遠。」這不是單純的情緒宣洩，而是一份KPI報告，話藝人不是沒有努力，是係管理同支援未跟得上。然後他再自爆會有新經理人幫手，就好明顯是將這段工作關係判下刑罰。

其實ViuTV的經理人也不是第一日被人鬧，過去幾年都出過好多事，而每一件事背後，其實都是同一個核心問題：他們不懂管理，只識管制，管制是要全世界聽你支笛，管理是要件事行得順、減少出事，就算出事都不要擴散。坦白講，個市已經好差，品牌愈來愈手緊，網民耐性亦愈來愈少，你一次處理得差，就等於幫競爭對手免費做宣傳。

所以，問題不是「193係咪啱」或者「保錡係咪無辜」，而是「經理人係咪可以專業少少」，出文前諗清楚是否需要同藝人對齊，諗清楚自己用字是否會惹人誤會，次次都是冷處理收場，等時間沖淡一切，那麼你的存在意義是甚麼？到最後，193事件最有價值的地方，是他無意中道出一個娛樂圈新現實：藝人不再只係被管理的對象，而是會反問管理是否有效的合作夥伴。當藝人開始覺得我自己落場都比你有效，你就不要怪他要求領隊換人。