永遠唔開電視的方太，遇上ViuTV開台，居然捉著我追看長毛與主席。隔幾日，更強烈推薦重溫《G-1格鬥會》。即是8位女子受訓上擂台打MMA的真人騷。「靚女打拳頭交，啱晒你睇啦。」方太一定以為我深夜起床，並非觀看C朗，是觀看女子摔角。
如果，是黃翠如，有個好叻仔的上市公司主席老竇，大概不會簽生死狀參賽。梁頌昕也不會。知名度足夠的，恐怕也不會冒著被毁容的高風險而豁出去。理論上，《G-1格鬥會》雖然是運動競技，勝負卻真真正正不算最重要，最重要的，是如何透過節目提高名氣，並且營造良好形象，討觀眾歡心。贏了比賽，有可能輸了未來；輸了場交，又有可能換取無限。雖然，實際上，辛辛苦苦操到又痛又喊，上擂台打紅了眼，係人都想贏。
不談節目出街前的是是非非。第一集，8人出場，7個講明肯參賽係因為想有人認識。餘下一個，叫王蘊妮Mimi，是滾軸溜冰選手，兼且係8項香港紀錄的保持者。參賽，因為想推廣滾軸溜冰。無得輸喎，先天已經佔有極大優勢。在討觀眾歡心方面。何況，笑容甜美，身材嬌小，年紀細，完全是哥哥姐姐爸爸媽媽最想保護的類型。然後，她向另一參賽者唐紫睿Hazel伸手，很友善。合理地，Hazel一臉愕然，介乎想握與唔想握之間。她之後試圖解釋：「因為我唔認識佢，唔知佢係邊個，咪唔識反應囉。」看得出，Hazel真係一個真誠少女，並非處事圓滑的世界女，做朋友一流。站在比賽立場，盡量減少跟潛在對手有交往，也有利。無奈，我們身處於只求片面觀感的二分世界。你欺負小朋友，你就係技安。
目標是推廣滾軸溜冰，Mimi成功達標。在推廣自己方面，在預告片，到第三集，由熱血運動員回歸溫室小花，有違群眾期望，難免扣分。但我相信Mimi也不太志在。餘下6個，黎美言Winkie與鄧穎芝Vangie屬於同一類型，曾經是歌手，鬱鬱不得志，好想好想借此機會拼死反擊。目標太清晰，用力一過度，好容易散出怨氣。社會上，怨氣已太重，一般觀眾大概會欣賞參賽者的鬥心，但同時又不太想目擊參賽者的面黑。何況，Winkie經常話自己的感情不受控制，Vangie又往往指桑罵槐，日常生活中，你見你太太見你女朋友見你公司同事，還見不夠嗎？(方太，請放心，我唔係話你。)
鄧洢玲Elaine與劉燕妮Rika與郭思琳Margiela又是另一類，模特兒出身，搏一搏可否打爛個花瓶。三人原本都行甜姐兒路線，傳統美女，殺傷力好似欠奉，個性亦看似最模糊。捱打時，理應博到觀眾同情，但同情很廉價，轉眼已被淡忘。得到的注目與皮肉的勞損不會成正比。
以觀看過首三集來衡量，大贏家極大可能是龍小菌。本身是網絡歌手，街頭獻唱出身，最接近草根，最不用講求身段。一出場，經理人一口道出現實慘況：「市道不景，你知啦，根本無乜job。」輕易換到大眾共鳴。又勝在不吝嗇自嘲，身形體重全部可以當作笑料，笑容較多態度較輕鬆又不失大家姐風範。換了在以前的審美觀，可能未出現已被攻擊得體無完膚，多得欣宜開山劈石，有誰還敢當面投訴？當龍小菌是女神是夢中情人就未必，但會當成身份認同的投射對象，當成需要支持爭口氣的弱勢社群，簡單一句，就是當成自己友。龍小菌最有可能成為第二個坤哥。今時今日，貼地最重要，8個MMA女子，我捧大有可能在敗部復活的龍小菌，場內場外皆雙殺。
方俊傑
觀塘長大，壹仔打滾，現職商台，偏愛西片、
西劇、中日韓美女。
利物浦悲慘球迷，
娛樂與感性並重。