歷時7年籌備，由rabbit@ptu執導的陳奕迅演唱會紀錄電影《FEAR and DREAMS：NOW is the only reality》，繼8月5日澳門首映後，周三(8月13日)在尖沙咀舉行香港首映，Eason更現身戲院，分享關於這套紀錄片製作和演唱會的幕後點滴。
整套電影長約一個多小時，所有跟「FEAR and DREAMS」世界巡唱有關的珍貴片段，包括台後實況、會議對話、彩排花絮和生活日常，都幾乎化為影像素材。譬如2019年11月，25場跨年騷全數取消，身為主角的Eason如何面對？2022年12月，Eason如願再踏上紅館舞台，卻因疫情要「自我隔離」，就連太太徐濠縈和女兒陳康堤也不能跟他近距離接觸；2024年5月，杭州站第101場演出，Eason因為身體抱恙聲帶撐不住要取消演出，他站在台上向觀眾道歉時忍不住流淚；2024年6月，Eason在香港打網球期間中暑休克暈倒，下巴撞地引致腮骨骨裂，要縫30多針，他留院時躺在病床上的容貌亦隨着紀錄片放映公諸於世。
還有Eason因為服用類固醇為聲帶消腫，但忘了吃胃藥導致胃氣脹，需要在會場躺下來休息；他要用電話接受耳鼻喉專科醫生問診；他要在酒店看脊醫正骨；他因「爛聲」發脾氣；他曾經想過就此結束巡唱……這些那些導演都用鏡頭攝下，再透過設計師朱祖兒、音樂總監陳哲廬和經理人甘菁菁的訪問，拼湊出Eason鮮為人知，卻有血有肉的一面。原來光環背後，這位總是在群眾面前大癲大肺的「神」，因為自我要求過高，擔心聲線出事，又害怕出錯，承受重大壓力，結果去年杭州站開騷期間開始出現情緒問題，後來證實患上焦慮症，現時仍有服藥。
身為藝人和公眾人物，Eason不介意在鏡頭面前展露自我不安和脆弱，他說那是基於對幕後團隊的信任。「可能因為同我拍攝嘅團隊就已經好熟喇，一路彩排已經認識，所以你喺一啲咁信得過嘅人面前，就容易講嘢啲啦應該話。」他特別提到導演Rabbit，解釋這套紀錄片之所以出現是緣分使然：「郭嘉萍就係Rabbit，佢一路都好想拍一個有水準嘅documentary，咁啱得咁橋我哋傾開偈，咁就話：好啊，你試下啦咁！」然而紀錄片的拍攝工作，並非在演唱會籌備開始之後同步啟動，Eason坦言這個比較可惜，「所以2018年嗰啲畫面呢，大家冇乜㗎，即係我同朱祖兒點樣開會，因為嗰陣時我又戇戇居居，唔記得攞埋(手機拍片)。手機好方便㗎嘛，開着佢record，咁(就)可以錄我哋嘅conversation，我又冇；有時傾得興起唔記得咗，冇咁理智。所以其實都係疫情中間嘅時候開始拍㗎啲嘢，呢個就係唔夠記錄，(成為)真實紀錄片嗰樣嘢，因為佢(朱祖兒)要後尾睇返自己啲sketch去講返(「FEAR and DREAMS」含義)，唯有係用呢個方法啦。」
另一個值得寫下來的，是一位來自深圳的媒體朋友，他用廣東話問Eason戲中一句很重要的話──Enjoy the mistakes：「你同後台班樂手、dancer講話『Enjoy the mistake(s)』……但都同時見到你會好着緊你嘅錯誤，你係點樣平衡享受錯誤喺現場，犯錯始終會內疚，會唔舒服，因為主流歌手好少人口中會講得出呢句說話我覺得，呢個係你現場好大嘅魅力，你點睇呢件事？」
Eason思考了一會兒，說了一則卅幾年前的舊事：「我都唔知點解我咁講(全場大笑)……應該講咁，我都會enjoy我嘅mistakes㗎，而家。我好記得嗰陣時，95年(翻查資料應該是1997年)《翡翠歌星賀台慶》，有一班歌手出嚟唱ID Song，係要唱TVB裏便啲節目嘅主題曲，譬如馬浚偉係唱《江山如此多Fun》主題曲，幾句嘅啫……我要唱係《絲綢之路》嗰隻歌(羅文原唱的《同途萬里人》)。嗰陣時用cassette帶，白色嗰啲嘅demo帶，係咁聽，聽咗60幾次，一路好緊張成件事。去到live，你哋而家喺YouTube搵到㗎喇，係甩得好勁㗎，而家係好笑㗎，但我嗰陣時係好嬲，我想講我make咗呢個mistakes，我係嬲咗自己成個月我記得，好嬲啊，點解個個做到我做唔到嘅？點解黎瑞恩、丁子峻(當時叫丁子俊)佢哋做到？你冇得賴個編曲，佢哋啲編曲都係咁衰(又再全場大笑)……所以而家我會係，我唔係好記得啲mistakes㖭啊，而家我鬆啲㗎喇，OK，好正。嗰陣時叫人enjoy mistakes啫嘛，通常叫人係容易過(同)我自己(講)。」