MIRROR今年真係唔應該去叱咤2.0
點解叫2.0呢？因為兩年前本欄已寫過同一個題目，近日又有傳媒引述廣告界人士消息，話MIRROR今年將會全體缺席元旦舉行嘅叱咤頒獎典禮，仲話令到贊助商唔再泵水。觀乎各方反應，我覺得比起兩年前，MIRROR今年更加唔應該去叱咤，決定寫篇2.0再力諫一下。
其實幾乎每年呢個時候，都會傳出鏡仔唔去叱咤嘅消息。之前幾年粉絲都會唔開心，覺得唔去就即係冇獎攞，唔想偶像將獎項拱手相讓俾其他歌手。不過今年粉絲反應180度改變，鏡圈一片「喜氣洋洋」，有人更形容係「鏡粉大團結」。除咗因為受夠年年幫襯各大商店換飛，有啲仲要捱黃牛，粉絲似乎亦都覺得偶像唔再需要由獎項去肯定。
唔只鏡粉，非鏡粉甚至係haters都非常歡迎呢個消息。有人質疑MIRROR驚冇獎攞所以先話唔去，其實近兩年MIRROR都只係拎我最喜愛組合，但都坐足全晚，純因為成績而缺席嘅推斷唔係幾成立，當然haters唔重視真相。無論如何，若果鏡仔今年出席叱咤，相信粉絲同非粉都會失望。咁點解仲要去呢？
事實上，MIRROR今年成軍7周年，獎項對佢哋來講或者已經係另一種意義。年初姜濤拎完我最喜愛男歌手同歌曲獎時話：「又要俾人鬧啦！」又叫網民「高抬貴口、口下留情」，反映獎項對佢哋嚟講，已經成為壓力，而非獎勵。離開下呢個遊戲，對大家或者都係好事。
其實粉絲不惜工本去叱咤，除咗緊張入去投票，都係想支持偶像表演，我見有鏡粉建議直接開個元旦演唱會，滿足fans之餘，唔使俾人鬧，似乎仲啱數。
綜合以上原因，我覺得今年MIRROR唔去叱咤，真係最民心所向嘅決定，毋庸置疑。唯一令我唔明嘅係，點解MIRROR唔去叱咤會影響贊助商呢？又話MIRROR唔紅？