節目巡禮對於TVB來講，重要程度不下於台慶，畢竟未來一年食粥還是食飯就是靠這一鋪。所以整件事要呈現比平時更犀利，比正常更精彩，務必令廣告客戶願意買帳，傾全台之力玩大晒冷一定少不免。
TVB利用節目巡禮想別人「科水」落廣告，而作為一般觀眾的我們，就可以透過它睇睇來年劇集、綜藝節目陣勢，睇大合照排位，以及睇哪個藝員最受廣告客戶歡迎等，去分析誰人備受力捧獲得更多資源。
綜藝節目方面好難稱上「有料到」，好多都是「炒冷飯」級別，又或者將一些見慣見熟的元素「溝埋嚟做瀨尿牛丸」。好似王祖藍、阮兆祥和李思捷主理《福祿壽訓練學院》，標榜「香港首個扮嘢真人騷」，話要全球招募有「扮嘢」天分的學員做接班人，但鍾意睇「福祿壽」戲仿的觀眾明顯少了一大截，節目能否大受歡迎，實在充滿疑問。又例如《紅白聲級戰》，搵《中年好聲音》參賽者與《聲夢傳奇》學員對壘，真心「創意無限」。當然，有一些節目還是能夠令人提起興趣，好像將陽光男孩丁子朗變成小白臉的選秀真人騷《亞洲超星團》，竟然請到韓流代表人物Rain擔任超星總製作人，實在令人好奇這個組合會擦出甚麼火花。
無綫安排《中年好聲音》參賽者與《聲夢傳奇》學員對壘，真心好橋，讓旗下歌手騷唱功之餘，又有曝光機會。
講完綜藝自然要講劇集。來年重點劇集有十套，包括大堆頭陣容有馬國明、蔡思貝、高海寧等但只得十集的《飛常日誌》；「收視殺手」馬德鐘主演的《再見枕邊人》和《非常檢控觀》；72歲鄭則仕主演的《神耆小子》；一睇主演陣容(陳山聰、劉穎鏇、張振朗及劉佩玥)就知道是文偉鴻監製的《奪命提示》；改名落足心機的《企業強人》；食過返尋味的「大IP」續作《逆天奇案2》、《巾幗梟雄之懸崖》和《法證先鋒6倖存者的救贖》，以及金牌電視人鍾澍佳做總監製《反黑英雄》。
當中最有睇頭可能是TVB和企鵝影視聯合製作的《反黑英雄》，有陳山聰、張振朗、袁偉豪、姚子羚和朱晨麗等一線小生花旦做主演，更是TVB最拿手的警匪題材，效果一定不錯。不過，個人覺得劇套最犀利一點還是揀了楊明做反派。楊明自從刑滿出獄後，一直只能夠在處境喜劇《愛．回家之開心速遞》做住先，未有機會重返正劇，今次可以「鹹魚翻生」，相信他一定格外珍惜這個機會。而且今次劇集與內地平台合作拍攝，劇情定必邪不能勝正，作奸犯科者不是死有餘辜就是鋃鐺入獄，所以他有可能可利用真實經驗，帶來更入戲更深層次的演出，絕對有望在台慶頒獎禮中贏取一個半個獎項。今次《反黑英雄》完完全全是俾晒位佢上，夾好天時地利人和，所以大合照企中間是陳展鵬和馬國明，而不是他(他竟然企第二排)，實在令人大惑不解。