老實講，《冰河世紀》系列向來唔係我杯茶，縱然是福斯旗下動畫工作室Blue Sky的代表作，看了前兩集後依然覺得故事麻麻、角色普通，但眼見它不費吹灰之力便獲得驚人票房成績，今年更推出至第5集《冰河世紀：隕石撞地球》，實在難以理解。
當年看《冰》片首集時，好笑歸好笑，但劇本其實好薄弱，人物之間只用一個「冰河世界」來連繫，除了身處同一地點之外，其實主角之間只是單一故事，直至推出多部續集後，誇張的大冒險情節，令觀眾開始有個譜，尤其是畫師賦予角色極浮誇的表情和肢體動作，將人物形象植入大人和小朋友大腦，唔好笑都迫到你笑，就算個gag再爛再低能，都會因為佢係小叻、森仔、文輝或者愛莉而變得討好。所以，這部片的成功，對我來說非劇本或導演，而是一眾人物設計師、畫師及後製團隊。
地心吸力式「愚」動 此系列的劇本雖然以史前為背景，但每集都衝出他們的「原生地」，而今集終於衝出太空，故事講述身處太空的松鼠仔小叻又闖禍，(又)為咗一粒果核而令冰河世界面臨大災難，就係巨大隕石從天而降，一群熟悉的主角如「長毛象」文輝、「樹獺」森仔、「劍齒虎」大阿哥等要(再次)離家大遷徙。這種大冒險情節固然睇到好膩，相信導演及編劇都明白，於是又再次動用必殺技──回歸基本。今次的故事啟發自首集曾出現的「冰封博物館」，內容、情節係點，相信大家都估到，都係科技浩劫做引子，然後走難走難再走難。不過今次都算有啲驚喜，畫面上，導演利用了太空元素──地心吸力來娛樂大家，幾位主角逐格式的肢體動作，的確準確地營造笑位。
森仔搵真愛 而今集另一有看頭之處是角色成長，以單一角色來說，《冰》系列人物一向不輸Pixar，而負責放送笑彈的森仔和小叻，在小朋友圈中的人氣更不輸胡迪或巴斯光年。今集幾位主角的人生都有不少改變，例如長毛象女蜜桃要結婚，加入了新角色──其未婚夫朱利安，牠與外父文輝的關係，其實是今集亮點之一，而媽媽愛莉對女兒出嫁的不捨，亦加入不少人性化描繪，而最受歡迎的笑匠森仔亦喺戀情上有新進展，過程都幾好笑。
主題係乜重要嗎？ 其實入場睇《冰》系列，唔好期望佢同你講人生或成長等大道理，故事主線係咩其實唔重要，不論係衝出宇宙抑或森林危機，鐵定不會有太多深層次探討，當然這有助於讓小朋友顯淺認識地球生態，不過大人就唔好期望太多。以此系列的往績，相信福斯必然會繼續拍，喜歡片中角色的觀眾，必然會繼續追，長壽系列就是這樣練成的。
WING~大學時代於台灣修讀新聞系，熟讀記者守則和新聞理論，可惜不務正業終日睇戲，索性轉行寫影評。