好得太過分？
本港政壇近日一片棄選潮，接連有議員出來宣布交棒唔參選。樂壇頒獎禮卻平行時空，話俾大家知冇得「棄選」，即使唔出席，都會「被參選」，仲有機會做贏家。
先要讚自己，經過連續兩年「筆諫」《MIRROR今年真係唔應該去叱咤》，今年終於「成功爭取」，仲要全隊會過澳門做跨年及元旦表演，同fans一齊倒數迎新年。我網上見鏡粉普遍都好開心，一來餓咗咁耐終於有「團活」，二來跨年同元旦活動都別具儀式感。有人仲相信即使要過大海加埋酒店錢，成本都可能少過往年張叱咤飛。當大家興奮地討論點樣搶飛訂酒店，我亦見到有鏡粉堅持入場睇叱咤，當中以「姜糖」為主，覺得要入場支持偶像攞「我最喜愛歌曲大獎」六連。姜濤回應時就話，fans有自己選擇，相信點都係為佢好。
究竟咩叫好？姜糖多年來力捧偶像喺「我最喜愛歌曲大獎」冧莊，到上年第五年仲平埋張學友及陳奕迅紀錄，確係好厲害。但我見到姜濤由第一年攞獎時一句「有信心地講香港會成為亞洲第一」，令人覺得呢個後生仔好爭氣；至上年攞獎時話「又要俾人鬧啦！」又叫大家「高抬貴口、口下留情」，話懼怕外界會將自己與前輩比較，明顯呢個獎經過五年，對姜濤來講已經由動力變成壓力。
加上非鏡粉甚至係haters都非常歡迎MIRROR今年唔去叱咤呢個消息，覺得可以俾其他歌手一個機會。都可以肯定，如果今年姜濤繼續冧莊，將會比往年更多人鬧，令姜濤在意嘅批評亦會更多，咁又算唔算為偶像好呢？
姜糖最後揀去叱咤投票定澳門睇騷，我唔識評估，不過可能可以喺另一個排名結果捉到路。網民票選「百大型男」排名年底又會有新結果，上年緊接雷神排第二，姜濤大叫尷尬，仲公開求fans唔好再幫佢上榜。唔知今年姜糖會尊重偶像意願，定係繼續「好得太過分」，反向操作，仲捧埋佢上第一呢？