娛樂圈deepweb
ERROR成員193(郭嘉駿)近日又做新聞人物，今次並非再遇交通意外，而是被爆戀情。只不過，這段緋聞不是事件重點，真正惹火的，是後續反應。
最近有位知名連登仔開post，貼出一張一男一女結伴同行背影照，聲稱193同Lolly Talk的Tania(陳紀澄)撻著；仲話兩人不止一齊睇騷，更在IG限時動態中用同款濾鏡，語氣寫到好似娛樂記者爆獨家，搞到不少人都湧入去食花生。不過導致爆post的，不是該連登仔講得有幾言之鑿鑿，而是193按捺不住，親自落場回應傳聞。他在Threads裡面直指相中人明顯矮過自己，又嚇該連登仔：「你騷擾到我的話，我就爆你係邊間公司打手，順手講埋你哋其他故事出嚟。」最後仲補多句「人不犯我，我不犯人」。
好快，該連登仔就轉了口風，話「小編瞓醒咗收到消息，指出圖中男人唔係佢」，雖然有縮沙之嫌，但他沒有完全認輸，仲拋個波返轉頭話：「我都希望快啲知道，自己喺佢心目中屬於邊間公司。」193之後就話打手帳號會在post頭幾個留言互相唱和，沒有獨立思考的人會以為意見一面倒，而他自己就「攞夠流量，見好就收」，不再回應。最後剩得該連登仔在討論區中叫囂，笑193笠水不敢提供證據。
三個回合打完，進入計分環節，到底誰勝誰負？那位連登仔沒有贏，但193由決定打這場打泥漿摔角就肯定輸了。
早排，MIRROR成員姜濤都中過同一個伏。
當時姜濤被質疑咪嘴，有網民出post寸他不夠專業，他便在IG反擊，先講「抱歉真的忍不了」，再公開tag對方並將其大頭相貼堂，搞到大量粉絲圍攻那位網民。當時好多人都鬧姜濤起底踩界，亦有人認為他情緒失控，所以他自己都好快刪文道歉，自認衰衝動的他更叫大家要提醒自己勿把鍵盤當武器，才令事件逐漸平息。
姜濤都算補救得快，傷得不算深，但都證明了一個事實：一旦選擇了落這個泥漿場，無論道理上你贏都好，觀感上你都是輸。
娛樂圈今時不同往日，以前個個都想將自己包裝得盡善盡美，今日卻個個都話要「做自己」。其實做自己也不是問題，但從來沒有人教藝人怎樣收科。鍾意就開火，嬲就還擊，對方回完又補多句，對方出一招你回三招。可是，社交平台不是拳館，更不是辯論比賽。
別人不會因為你出拳快狠準而叫好，更不會因為你講得幾有道理就自動判你贏，只會睇你是否夠chill夠冷靜。你愈上心，對面就愈氣焰，你講得愈多，就愈似身有屎。193自稱「娛樂圈deepweb」，但真正的deep，不是你手頭掌握了幾多料，而是你對事態發展的推演諗得夠不夠深入、周全。老實講，193今次係真的不夠deep了。