藍奕邦與G.E.M的風波，好似單方面發聲。
藍奕邦
「宇宙G.E.M.」鄧紫棋回來了。8年未在香港開騷，即一口氣在啟德主場館開足5場，仲要一票難求，真心犀利。
演唱會開到如火如荼，網絡亦不遑多讓，G.E.M.過去的惹火言行一一被翻出，與她有牙齒印的藍奕邦更在Facebook私人帳號爆粗開火，寸爆G.E.M.「唱得好勁，但cheap」，仲話自己「有骨氣、有尊嚴、有品味」，而唔似對方「窮得只剩錢」，「insecure到要搵打手洗白」。Post雖然並非公開，但他自己都預料有人cap圖瘋傳，結果一如所料，全港都睇到。
洗白，絕非甚麼新鮮事。最近幾年，G.E.M.粉絲都好積極為偶像辯護：有人提她之前的叱咤風波，就有人話「唔好再翻舊帳啦」；有人提佢當年的態度問題，就有人回覆「咁佢真係有實力嘛」。結果，過去種種錯失，在fans眼中就是「你就似沒存在」，剩低的只是她的音樂和舞台，而你好難分辨到這些言論是自發，還是背後牽涉金錢。
就當所有撐G.E.M.都是真心英雄，但問題是，真相不會因為大家封口不說就自動消失。網絡世界有記憶，舊片舊文就算幾耐之前發生都會有人做考古學者摷出來討論。洗白可以一時得手，但總會有人飾演反駁隊，屆時事件就自動有人幫你還原。
藍奕邦自己今次就中了回力鏢，他口口聲聲話「冇上大陸賺人仔」，話自己留守本地市場，有骨氣。豈料網民記憶力不錯，好快就搵到他2012年北上到廣州開演唱會的海報同片段，有幾多骨氣都煙消雲散。
所以，洗白同考古，其實是同一場遊戲。有人幫偶像辯護，就自然有人會翻他舊帳；有人要樹立形象，就自然有人會祭出他的另一版本。想人忘記？Sorry，網絡不會失憶。
娛樂圈最荒謬，就是大家都沉迷這個「歷史修正主義」遊戲。G.E.M.想被記住的是舞台萬人空巷，但總有人記得佢當年投訴頒獎禮不公平；藍奕邦想被記住的是「骨氣、尊嚴」，但總有人記得他也曾搵「人仔」。沒有人能夠真正控制「自己的歷史」——你不提啫，總有人提。
舞台上的燈光可以短暫耀眼，但互聯網是永久留底。今天你唱得幾好，幾爆場；明天有人照樣cap返十幾年前的新聞，放上枱再講一遍。娛樂圈不止講才華同人氣，更加是一場記憶管理的攻防戰。
所以，G.E.M.可以繼續唱到全場大合唱，藍奕邦亦可以繼續在鍵盤度寸爆人；兩邊粉絲繼續開火，繼續互相翻歷史、互相洗白。但最後贏的都不是那位「宇宙巨星」，都不是那位「uncle」，而是那個不會忘記任何事的網絡。
洗白是人人都想做的事，但歷史，網絡早已經幫你做好備份。