當《東張西望》關心「某男團」

MIRROR演唱會補場換飛，大台《東張西望》一連兩日以「某男團」報道一班「苦主」。我覺得呢單嘢係一個生理課題，點解？先分享下「苦主」們嘅指控，以及我八到有關演唱會嘅幾個重點：
1）「唔知道舊飛要換，主辦方只喺自己社交媒體公布，有冇搞錯？」事實係九成半以上嘅人已經換晒飛，究竟係主辦方宣傳不周，定即使鋪天蓋地宣傳，有啲人都唔會接觸到？我終於明白點解電騙講咗咁多年，都仲會有人上當。主辦方一年前已講明有退飛安排，之後又宣布補場同換飛安排，持票者有成年去換。我當你只追蹤個別成員嘅社交平台，睇唔到公司公布，都睇到換飛時送紙扇，啲fans互相交換啩，退一萬步，公司次次公布都有傳媒報道，又睇唔到？

2）「我之前係尾場第一行，而家換唔返，點解張敬軒、鄭秀文又做到？」事實係MIRROR演唱會同其他歌手嘅補場唔同：MIRROR要轉場地，由紅館去亞博，萬幾人變9千幾人，四面台變三面台，現實零可能做到個個同一場同一行。我聽講公司都知道場地安排唔同咗，會編排多啲演出喺T字台，而家投訴自己坐遠咗嘅人，到時會發現自己對正台。

3）「《東張西望》講完之後，公司就話可以退錢，擺明補鑊。」時間線上好似幾啱，不過我聽講主辦單位其實預咗換飛後，會有班因各種原因去唔到嘅人，所以一早就決定會安排退錢，諗住細節逐步公布，點知間接幫咗《東張》「成功爭取」。邊個領功唔緊要，最緊要鏡粉收貨，而我又見到有鏡粉開始話大台居心叵測。

成件事，你話《東張西望》為民請命，或者陰謀論話佢想打擊MIRROR，都得；你話主辦方溝通混亂，或者你話佢地面對史無前例複雜程度都有九成半以上人順利換飛，亦得。我睇到嘅係，無論係支持者定係攻擊者，對MIRROR相關嘅事，經已去到一秒即有生理反應，而呢個反應唔係基於信任與不信任，似係無用過隻耳同個腦，而係把口或手指快過一切。