ViuTV嘅MIRROR小組團綜播咗幾集，反應唔錯。姜濤、Anson Lo、Jeremy同Edan去首爾，參觀三大娛樂公司之一嘅SMTOWN，仲有Super Junior嘅崔始源帶路，幾個鏡仔開心到癲晒，仲話要簽SM。熱鬧之際姜濤爆咗句：「我哋仲有三年合約咋。」網上立即有熱烈討論，亦刺中咗部分粉絲嘅心。開開心心嘅節目背後，係咪隱藏咗傷感？但大家可能錯咗focus。
第一：MIRROR簽咗10年合約唔係新聞，粉絲傷心嘅唔係而家先知倒數三年，而係班仔喺節目七嘴八舌間突然提起，反映佢哋心入面一直記掛住個合約期限。呢個先係重點，對真鏡粉嚟講，亦係相當戳心嘅片段。
第二：10年對一個團體來講其實已經好長壽。亞洲好多男女團都係幾年就散，即使冇解散，都係各自發展，幾年先聚一聚。MIRROR成軍以來，即使近年全團現身的確少咗，但佢哋公司都明顯努力維持隊型，推個人發展之餘亦有小組，成軍7年都仲不停出歌、電影同舞台劇等。老實，要12個成員都主力做團其實唔現實，歌影視都各有發展唔止正常，仲係健康。就好似小學畢業會有唔捨得，但升中就係另一階段，對個人同團體都有好處。
第三：「簽SM」、「仲有三年」竟然可以喺ViuTV節目播出？呢個係我睇到後第一反應。或者我哋都慣咗「真嘢唔好講」，亦冇諗過香港電視台可以有呢個胸襟。ViuTV同Makerville 嘅出現，少少地同時實在地，改變娛樂圈生態。雖然有人批評ViuTV做得未夠好，但睇完呢集，我覺得呢種進步唔只靠「大方」就做到，而係要由執行到高層都有真心想推動娛樂圈進步嘅人，希望一步步改變行業。唔只係幕前，背後有更多大家唔識嘅人一齊努力先至爭取到呢啲「小確進步」。
外界總係用業績或八卦新聞去評論一間公司，但真正嘅進步往往係微細但重要嘅。無法預計往後會有幾多的變化，但總會有留低嘅掌印。MIRROR總有一日會完，但佢哋仍在嘅時候每人嘅一小步，都令娛樂圈唔係淨係娛樂，而係隱隱地令我哋喺混沌中都感覺到希望。