直擊街舞比賽香港冠軍誕生
剛過去周日黃昏時分(9月17日)，世界級街舞比賽《Red Bull Dance Your Style》首度登陸香港，於尖沙咀香港文化中心露天廣場舉行，由天光到天黑，我幾乎企足全程，見證這位香港冠軍如何誕生。
今次比賽雲集本地街舞精英，16強選手由10男6女舞者組成，他們各自擅長不同舞種：Popping、Hip hop、Waacking、House、Voguing、Krump、Locking以及Freestyle。當中知名度較高的計有曾經參演電影《狂舞派3》(2021)、飾演「熊貓」一角的林悅榮(Bobby)；曾參加《全民造星V》的田曜誠(Tsoul)和鍾澤誠(阿澤)，以及2021年參加《全民造星IV》的陳玥伶(SIUSA)等等。
16強選手需要按照抽籤結果，決定組別(藍組和紅組)、對手和出戰次序。賽事採用循單淘賽制，16強至準決賽，兩組選手需要完成兩個回合對戰，每場一分鐘，而負責打碟的DJ KEI都會在每個回合開始時換歌，參賽者需要配合歌曲旋律和自己擅長的舞種做出不同舞蹈動作，換句話講：參賽者有幾多斤両真係一眼睇晒。現場觀眾須於每場比賽結束後，以舉起摺扇投票的方式決定誰人晉級，得票較少的一方即時出局，勝出者則晉身下個回合繼續跳。去到總決賽，兩位選手完成三個回合後，同樣交由現場觀眾投票，決定冠軍誰屬。
經過120分鐘激戰後，Bobby最終擊敗同樣經驗豐富的SukiRabbit稱王。他將會代表香港出戰，參加11月4日在德國法蘭克福舉行的世界總決賽《Red Bull Dance Your Style World Final》，在現場近5,000名觀眾的見證下，與全球各地的冠軍舞者較量，爭奪冠軍寶座。
比賽結束後，在大會安排下，與Bobby一同站在舞台中央傾幾句。我問Bobby當下有何感受，看得出筋疲力盡的他說：「好熱，好攰，完全諗唔到嘢，我淨係想𠵱家飲酒，放鬆……同埋沖涼，同埋同我嘅朋友hang out(出去玩)，攬一個，就係咁簡單。」踏上舞台之前有足夠信心嗎？他坦言一定要相信自己：「我信我自己嘅嘢，我信我自己嘅能力，因為呢啲都係我自己努力過嘅嘢，咁我(成績)好與唔好都係我自己負責任，我有冇信心？我上得呢度就一定要有信心……呢度個個人都好有信心，冇信心嘅人，我諗上唔到呢個台。」
對於自己個半月之後就要遠赴德國參加世界總決賽，Bobby認為自己心理狀態不俗，反而體能需要加強，「其實我9月4號返咗嚟香港，我對上(之前)就係去咗歐洲，我嗰陣時就係去比賽，但係個比賽我係入唔到嘅，因為海選真係一啲都唔容易……我諗呢個世界好大，但亦都好細，我要準備嘅嘢就係調節好自己嘅心態，但係我覺得我嘅心態……如果造就到咁樣攞到冠軍嘅話，我應該心態不嬲都好嘅，但要點樣去調節就可能係體能啦。希望我努力啲呢幾日去做gym啦，練好啲core(核心肌群)。因為6月嘅時候，就係book咗機票去荷蘭玩比賽時，前一個月整親右側韌帶，而家都有少少唔舒服嘅。」
Bobby習舞至少15年，如今成為香港冠軍，我問他有甚麼說話想跟一班仍然默默苦練，堅持「跳出我天地」，堅持「對得起自己」的街舞者說？他說出兩個重點：既要努力，更要自己鍾意！「努力啦！我相信你自己鍾意嗰樣嘢，其實你唔需要諗太多啦，因為你可以有個目標，但係如果諗到你嘅目標，你真係做完(但)失敗咗，你會唔會放棄啊？咁你成功咗，你得咗嗰個目標，你又會唔會放棄啊？其實可能真係唔需要諗咁多嘢，呢樣嘢係你自己鍾意做嘅，你繼續做你自己嘅way(方向)，trust yourself(信自己)，回報係一定會有，只要你係不斷付出緊，然後見識多啲啦。不斷去跳舞，去試多啲啦，唔係淨係比賽啦，因為跳舞都唔係淨係比賽嘅，你可以去party，你可以去感染唔同嘅人啦，或者同唔同嘅人傾偈。」