互聯網同社交媒體嘅出現當然有好多好處，在此不贅。但最近發生咗好多事，都令我開始覺得，互聯網同社交媒體會令人類走向自我滅亡居多。
Coldplay演唱會kiss cam事件。其實呢個世界好少有一件事可以做到跨國界都知，呢單嘢發生24小時內，中外老少男女已全部講緊。世上有好多天災戰爭、政經糾紛，即使係娛樂新聞，都不及呢單主角本來冇咩人識嘅「同事三分親」花生。CEO出軌當然唔啱，但係咪值得世界咁多關注呢？呢個冇人策劃、冇打手，完全係因為互聯網同社交媒體嘅生態衍生出來嘅必然結果，即係冇人發起，亦冇人阻止到 。
睇返香港，一個公眾人物嘅一句說話一個行為，被人拎來茶餘飯後講下笑就預咗，但獲得嘅注視同連鎖反應往往係不合比例。早前一位藝人個妹同個健身教練出軌，都可以講成個禮拜；一個我連名都噏唔出嘅幕後出軌又講，一個歌手出張圖又講幾日。唔係話呢啲嘢唔值得講，而係關注度不合比例，我覺得呢個現象緣於三個字︰無力感。
生活喺一個極被動嘅現實環境，正經嘢唔識討論，重要嘢又唔到我搞。黃子華金句︰「睇人XX最開心」係永恆嘅真理，有互聯網同社交媒體加持，更變本加厲。因為更容易睇到有人XX，唔只睇，仲可以share，亦可以寫一大篇評論插多兩刀，令到XX嘅人更難翻身 ，旁觀者成為加害者 。
世上有地震海嘯等天災，互聯網同社交媒體或者都已成為一種不成比例嘅災害。點樣解決？知道嘅人應該攞諾貝爾和平獎。作為希望世界和平嘅人類，只能略盡綿力，提醒自己上網嘅時候，重要嘅嘢可以講多句，唔重要嘅嘢就講少句，唔好麻木於無力感，亦唔好不經意地加害。因為任何人都有機會成為受害者。