1. 名句「(o靚)仔，你邊度㗎？嚟呢個球場玩！」，出自於撲滅罪行委員會之「舉報黑社會」宣傳短片。
2.、3. 瀡滑梯、搖搖板、氹氹轉、打韆鞦、爬鋼架、鐵馬仔，已逐漸消失於近年間。
2.、3. 瀡滑梯、搖搖板、氹氹轉、打韆鞦、爬鋼架、鐵馬仔，已逐漸消失於近年間。
4. ：電影《少林足球》中，強雄的名句：「球證、旁證、足協、足總、足委，全部都係我的人，點同我打呀？」
呢個場不嬲都係大人玩，你兩個細路莫想憑選票，就可大搖大擺嚟做代表。要知道大人定下的重重關卡，可以按我主子心意，不斷用公帑去司法覆核，遊走穿梭於法律罅。我做主、你做客，莫講話超支撥款，甚至乎議員資格，龍門規則都可以搬到你怕。
細個時記得電視有個廣告，見一班青少年大聲夾惡，其言道：「(o靚)仔，你邊度㗎？嚟呢個球場玩！」當中兩小無猜就被那些人三五成群，兇到鼻哥窿都冇肉，只好頭耷耷、眼濕濕，有金都唔識執，落淚都唔敢去找家人。又有邊一個會估到，昔日的暴力欺凌，會發生於今日崇高的議事會堂和院舍院長身上，禮崩樂壞，功能霸道。
伸張正義，傑青有責 其實上述對白出自於1989年，撲滅罪行委員會之「舉報黑社會」宣傳短片，記得以前細個嗰陣，樓下屋邨公園同球場總有些「飛仔」嘍囉，蝦蝦霸霸，係人都去兇，唔順眼就打。一般他們都會聚集至半夜三更，所以吾等良好小學生，就算係放學放下晝班，通常都會快快帶同弟弟回家，免得俾人圍、俾人。仍記得有一次，無意得罪同班同學，點知佢通知佢「大佬」，翌日就等我放學。俾十多個人跟尾然後「老圍」，都咪話唔可怕。年紀輕輕，擔心咗幾晚，都唔敢向老師告發，可想而知智障院友，面對衣冠禽獸，只得無聲吶喊。可悲不見有傑出青年，晒命之後以身份去彰顯公義。
純真青蔥，敗於宅化 昔日球場和遊樂場確可聚人，三唔識七都可以交換電話號碼。撇開那些童黨跟班，街坊街里跑跑碰碰玩樂一番。汽水、薯片、西瓜波、發泡膠飛機，良朋歡笑心間，知足有如富甲天下。相處中有如契哥與細佬，還會於家長面前幫忙講句好話。公園玩樂總會遇到同校同學，朝見溫文，晚見百厭，校服以外，純真一面。若然當中有同年異性，各人一言一語，發展小學雞的霧水情緣，心思思又唔敢話佢知，你話係咪幾咁低B。 不過香港由街童習慣變到宅男文化，由追逐互動去到貪Like喪Po，戶外去到室內，溝通生活變為孤獨主觀。分享只限於意見而不在於擁有，仲邊有一支汽水兩份分咁難得。沒有童年，只懂上網，不善溝通，只用符號。有乜唔妥，粗口四罵，虛擬現實，欺凌文化。不懂慎思，不會明辨，一手琴技，毫無造詣。仲要「我好悶，你好煩！」難怪政府高官，口說建立香港，但個個仔女都留學去英國，多飲鹹水，免中鉛毒。
理想難行，遊場落霞 瀡滑梯、搖搖板、氹氹轉、打韆鞦、爬鋼架、鐵馬仔，已伴隨那份簡單互動的滿足感，逐漸消失於近年間。 所謂土地發展、或青年事務，又是否只剩下有樓有舖，利益輸送。有人深具理想，有人生無方向。當然每個場都有佢嘅潛規矩，未落場之前玩大就真係會都唔使去。波都未踢，又何必咁快去學前輩玩口音講大話。要知道「球證、旁證、足協、足總、足委，全部都係我的人，點同我打呀？」所以要爭取落場，免被糟蹋，發揮球迷的期望，於賽事中踢一場漂亮的好波，又何必拘泥於開賽前的國歌，搞到出師未捷身先屎呀！ 小孩行為，反映大人的身教問題。如睇唔過眼，只怪上一代的壞榜樣建立，每況愈下……