Ray早前介紹過海運大廈新秘境，位於擴建部分的全新270度維港觀景台，昨日起全面向公眾開放，仲正式命名為「海運觀點」。Ray昨日上去睇過，270度日景同夜景認真唔錯，海港城友好話位置臨海向西，日落景最無敵，而且視乎當日天氣等因素，次次睇都有唔同感覺，有時好紅，有時係好大個鹹蛋黃，睇極唔厭，啱晒攝影發燒友同情侶拍拖打卡，唔知有無人搶先揀定呢度示愛或者求婚呢?

九龍倉置業有限公司執行董事 凌緣庭 話，擴建部分由國際知名的Fosters + Partners設計，前後搞咗5年，而家可以話鬆一口氣。至於下面4層以食肆為主，會陸續引入11間首次於香港登場的著名食肆，希望做到口味國際化，而家已經開張的4間生意唔錯，訂位要手快，而由於個景色真係好特別，故決定將頂層向公眾開放，並建好了兩個各6,500方呎的活動平台，其中一個更是天然草坪，另外更設可容納約200人的戶外梯級式看台，希望為香港增加一個吸引遊客的景點，亦為商場帶來額外人流。觀景台打響頭炮嘅活動，係同「美酒佳餚巡禮」與「香港盛宴11月」合作，由本周四(26日)起至下月12日舉辦以品酒及美容為題嘅「Sparkle & Shine」活動，千祈唔好錯過呀！

如果你未得閒去「朝聖」都唔緊要，am730幫大家拍咗片先睹為快，可以去官方Facebook參考一下！