am730個手機程式同facebook專頁早兩日出咗條幾好睇嘅短片，編輯約埋3位政壇元老級人馬一齊攻打四方城，包括自由黨創黨主席李鵬飛 (飛哥)、民主黨創黨主席李柱銘 (馬丁) 同民建聯創黨主席曾鈺成 (曾主席)。
今時今日，三個小生講說話都冇乜顧忌，麻雀枱上大爆內幕，都幾有趣，例如馬丁話自己未出世已經識打麻雀，因為佢出世時阿媽係打緊牌嘅，而飛哥就話以往經常於馬丁家打麻雀，麻雀腳仲有周梁淑怡、張敏儀，已故張鑑泉同肥姐(沈殿霞)等，以前仲打到好大，隨時6位數字上落。至於曾主席大學時主修數學，邏輯思維夠晒慎密，但於麻雀枱上有另一番體會，就係人生係講運嘅，佢話有時叫三飛，等極都等唔到，但人哋傻傻咁單吊都即刻食。
Ray反而好想知佢哋係真打定作下狀扮打，編輯大人話梗係真打啦，仲話各人都打得好認真，打嘅係廣東牌，飛哥最密食，仲食咗鋪清一色自摸8番，果然高章，但最好笑係大家坐埋就打，事前冇講清楚打幾大，可能大家太開心，結果錄影完就散隊，原來最後冇埋數計真錢嘅，純屬遊戲。條片就呃咗唔少Like，昨日仲出咗第2集，Ray好期待第3集呀。
