上海雲吞、小籠包大家就食得多，但係正宗江蘇美食大家仲試過幾多呢？Ray昨日於江蘇社團總會，睇住唐英年同高海寧兩位江蘇人即席製作兩款當地美食：包括有淨腸功效嘅薺菜糰子，同特別多汁嘅菜肉雲吞。唐生話下周維園嘅江蘇嘉年華除咗地道小食，仲有好多工藝品同表演睇，最緊要係免費入場。

工藝展品中有一件重約150公斤、名為「螳螂白菜」玉雕，聽講從未出境展出，淨保險都百幾萬元，該件展品更獲04年第五屆「中國工藝美術大師作品暨工藝美術精品博覽會特等獎」，仲係上海世博會江蘇館嘅鎮館之寶。

唐生話第一次搞呢啲活動唔識預人數，但會叫大會整多啲好嘢食等大家嚟試喎。嘉年華會喺維園搞足三日，由本月20至22日，首日晚7點才開始到10時，翌日朝10晚10，最後一日則於黃昏6點就完場啦。