在政府實施禁晚市堂食的前一晚，在中環某中餐館吃飯，鄰枱一家四口也把握禁令推行前的機會，享受「最後的堂食晚餐」。餐館食客不多，環境寧靜，偷聽到鄰桌一家人由批評特首的防疫政策「彈入彈出」，一日之前由「不會收緊措施」變成「疫情發展令人不安」，討論到對下屆特首須具備的特質，由於對話啜核抵死，不得不節錄下來與讀者分享。
外貌年約三十多歲的兒子說：「下屆特首要緊要識打機，尤其是打Sim City。」為方便年輕讀者，得補一句，Sim City是一款城市規劃和管理的電腦遊戲，玩家除了規劃和興建房屋、基建，如果管理不善，會出現火災、搶劫、暴動等情況。「以往特首淨係識起基建，又唔肯俾錢買地起住屋，所以市民滿意度低、影響稅收、人口流去隔籬個城係好正常。」說著說著，兒子已經把遊戲的術語融入評論。
妹妹搶白說：「使鬼特首識玩Sim City咩，而家話起明日大嶼、北部都會區，因為版圖已經超越深圳河，已經輪唔到香港特首規劃。如果特首要識一樣?應該要識元宇宙，咁先夠貼近香港人。因為香港人已經處於『完宇宙』，香港呢個宇宙已經玩完……」
「特首最緊要好打得，你睇下呢個特首，短短六個月，就打倒一眾『反中亂港』組織、媒體。」父親似乎是典型的愛國者，「不過最厲害的，是佢連昨日的自己都打倒，上任果陣話將防賄條例管埋特首，幾年後大言不慚話一定走數；呢頭催谷投票率，轉頭話投票低代表政府做得好；兩年幾前話感謝市民踴躍投票，今日話2019年選舉不民主……」
還是媽媽最有見地：「乜都唔使識，最緊要識直接派錢，唔好再搞咩消費券，一人派一萬。有呢個政綱，我就支持！」