今次抽了兩天去了銀行溫泉。
我知道我將這件事講出來，絕對會引起大家質疑我有早期腦退化的跡象，否則，就一定會被說成是撞了邪。但無論如何，我自己都解釋不了，究竟這件事是如何引發，又如何不早被發現的——剛剛的禮拜日，我同老婆在東京「走咗飛機」(即係「走咗車」嘅飛機版)。
「走飛機」時有發生吧。多數是睇錯上機時間，又或者有事遲到，而我的原因是……完全沒有原因，這才是解釋不到的地方。原定計劃非常好，我其實一早換好了兩張從東京羽田機場出發(留意！係羽田機場！)由當地時間下午4點上機，返到香港8點鬆啲(留意！啲時間非常好)嘅Business Class機票(留意！係Business Class！)旅程中，我還跟我老婆講了幾次「嘩，買咗咁多嘢，好彩係坐Business Class返香港，每人有兩件23kg行李，如果唔係一定爆。」
上Limousine巴士去機場前，中午在新宿再買多轉手信先走。去到機場，仲要施施然落巴士，心諗「唔急吖，4點機，而家都係3點45分。」而我更加一早已經Online Check in埋，終於要搵位Bag Drop。「Oh Shit！」我就好像周星馳在《國產零零柒》內，剛去到「麗晶大賓館」前的樓梯，手一鬆，行李就跌落地一樣，同時講了句粗話。「呢單嘢唔係我老婆跟開。」今次的機票是我換的，連Limousine巴士的飛都是我買的，所以她一直不知道到底發生過甚麼事，直至看到我的表情。
你不會以為我第一次坐飛機吧(其實即使是第一次也不會犯這樣的錯的)？我就係連自己都解釋唔到，點解會突然間唔記得咗，要早兩個鐘頭去機場。當時在機場，搵原因已經太遲了，只能立即想辦法，沒有人會突然送兩張機票給我們返香港。
因為我星期一公司有好幾個會議要開，我不想No Show(雖然剛在機場No Show了一次)，所以想設法最快即日回香港。最後經過一大輪工夫，買了另一間航空公司，從成田機場(冇錯！要由羽田坐車過返去成田機場，最後坐了兩小時火車)，當日晚上9點起行，凌晨2點回到香港的Econ機票(冇錯！今次變返Econ)。最終返到屋企係3AM，安頓好可以瞓已經5AM，瞓3個鐘左右又要起身返工。
最多人聽完這故事都問「你老婆有冇鬧爆你？」冇，佢話佢見到我已經好自責，我不停話「我究竟係咪低能嘅？點解會咁？」所以就費事再鬧了。這件事唯一得著就係，我老婆真係好偉大，多謝佢唔鬧我，仲接納我係低能嘅。
